الاثنين، 2 مارس 2015

سەلەفی بوون و گومان لە قورئاندا ئەوە نەسخی قورئانە یان تەحریفکردنە؟!

سەلەفی بوون و گومان لە قورئاندا
ئەوە نەسخی قورئانە یان تەحریفکردنە؟!

محەمەد هەریری

هیچ مەجالی تێدا نییە لە حاڵەتی سەلەفی بوون هەموو تەقدیس و بایەخ و پیرۆزی و کێشە لەسەرکردن و بەرگریت ئاڕاستەی حەدیسە و بەیت وبالۆرەکانی قال و قیلەیە. لە بەرامبەردا ئەوپەڕی فەرامۆشی و تێڕامان و پوکانەوەی پایە و داماڵین لە تەقدیسدا ئاڕاستەی قورئان دەکەیت. بۆیە بۆ نمونە ئامادەی شەڕی نیوەی ئومەت بکەیت و بیاندۆڕێنیت بۆ سەلماندنی [ناقصات العقل و الدین]ی ئافرەتان، نەوەك حەدیسێک بڕوشێت یان ڕاویەك بکەوێتە ژێر گومانەوە، بەڵام کاتێ دەیان حەدیس دەخوێنیتەوە کە گورزی گەورە لە ڕاست ودروستی قورئان دەدات، زۆرت پێ ئاساییە و بەدوای بڕ و بیانووی هێندە سوك و بچوك دەگەڕێیت بۆ تەئویلکردنێکی نا مەنتیقی ونائاسایی کە خەڵك بهێنێتە پێکەنین، دیسان ئامادە نیت دڵی موحەدیسەکان و حەدیس و ڕاویەکان بڕەنجێنیت، با تەئویلکردنە نا مەنتیقی ونائاسایی یەکانیشت کۆڵێك گومان وریب و شك بخاتە قورئان، کەچی ئەگەر کەسێکی نائیماندار گومانی خستە قورئان، یەکسەر ئایەتی [انا نحن نزلنا الذکر وانا له لحافظون] ی بۆ دەخوێنیتەوە، نازانی خۆشت باوەڕت بە حیفزکردنی قورئان نییە بەپێی ڕیوایاتە زۆر وزەوەندەکانت.  کاتێ گوێم لە ڤیدیۆیەکی شێخێکی سەلەفی دەگرت، کە بەو خەلەفاوە دەڵێن گوایە زاناترین کەسی سەر زەوییە لە عیلمی حەدیسدا، بە جۆرێك قسە دەکات ئیماندارانیش دەخاتە گومان  و گومانت لا دروست دەکات لەسەر ڕاستی و دروستی قورئان دا!

دەڵێت گوایە قورئان چەندین ئایەتی تێدا بوە و ئێستا نەماوە و کاریشی پێدەکرێت!!!! بێگومان ڕیوایەت زۆرە لەو بارەوە کە سورەت و ئایەتگەلێکی زۆر لە قورئاندا هەبوون ئێستا نەماون! ئەگەر بە لۆژیکی ئەهلی حەدیس بێت هێندە ڕیوایاتگەلی گومانخەر لە قورئان دا هەیە، نازانم چۆن دەتوانن شانازی بەوە بکەن کە قورئان پارێزراوە وەک تەورات وئینجیل نییە شتی لێ کەوتبێت یان دەستکاری کرابێت! چۆن دەڵێن ئەوەی گومانی لە حەرفێكی بێت کافر دەبیت، کەچی ڕیوایاتەکان دەڵێن سەدان و بەڵکو هەزاران ئایەتی لێ دیار نەماوە یان بزر بوە یان جەڵەب و ئاژەڵ خواردویەتی!!! ئەگەر ریوایاتی ئاشکرا بڵێت، سورەتی الاحزاب کە ٧٣ ئایەتە  نزیکەی بەقەد سورەتی البقرة بوو، یان درێژتر بوو، کە ٢٨٦ ئایەتە، وئایەتی ڕەجمیشی تێدا بوو!! [عن عمر وأُبي بن كعب وعكرمة مولى ابن عباس: "أنّ سورة الأحزاب كانت تقارب سورة البقرة، أو هي أطول منها، وفيها كانت آية الرجم"] لەو هەموو سەرچاوانە هاتوە: الاتقان 3: 82، مسند أحمد 5: 132، المستدرك 4: 359، السنن الكبرى 8: 211، تفسير القرطبي 14: 113، الكشاف 3: 518، مناهل العرفان 2: 111، الدر المنثور 6: 559

لە کۆنەوە چەندین بیانوویان بۆ ئەو حەدیسە گوماناویانە هێناوەتەوە، لە هەموویان خراپتر مەسەلەی نەسخە لە جۆری نەسخی لەفز و تیلاوەت یانی لادانی لە قورئان لەگەڵ مانەوەی حوکمی ئایەتەکان!! دەڵێن نەسخ سێ جۆرە ، یەکەم ئەوەی لەفز و حوکمی نەسخ کراوە، دووەم ئەوەی لەفزی ماوەتەوە و حوکمی نەماوە! و سێیەم ئەوەی لەفزی نسخ کراوە و حوکمی ماوەتەوە!! نسخی لە جۆری یەکەم و دووەم ماقوڵە و ڕێی تێدەچێت تا ڕادەیەك، هەرچەندە کەسانیک مشتومڕی زۆریشیان هەیە لەسەر ئەو دوو جۆرەش، ومنیش گومانم لە جۆری دووەمدا هەیە کە گوایە لەفزی ماوەتەوە و حوکمی نەماوە! ئەوە کێشەی من نییە ئێستا، بەڵکو ئەوەی کێشەیە بەشی سێیەمی نەسخە کە دەڵیت: لەفزی نسخ کراوە و حوکمی ماوەتەوە!!

- ئایەتی شیرپێدان

لە ڤیدیۆی هاوپێچی ئەو بابەتە ابو اسحق الحویني بە نمونە باسی چەندین ئایەت دەکات گوایە لە ناو قورئاندا نەماوە و حوکمی ماوە وەك ئەوەی عائشە [رض] دەگێڕێتەوە: کانت مما انزل من القرآن عشر رضعات معلومات یحرمن، ثم نسخن..... ، ومات رسول الله و هن مما یقرأ من القرآن!!! [ لە قورئاندا هەبوو ئایەتێك کە دە ژەم شیرپیدان حەڕام دەبیت، دوایی بوو بە پێنج!! دەڵێت ئێستا کەسانێک دەڵێن ئەوە لە قورئاندا نیە؟! پێشمان لێدەگرێتەوە ئەو بلیمەتە، بەڵێ لە قورئاندا نییە! ئێستا هیچ کێشەش نییە ئەگەر بڵێن ئەوە حەدیسە بڕایەوە، چونکە حەدیسیش لای ئەوان هەر حوکمی قورئانی هەیە، یەکیکە لە دوو وەحی یەکە! چی پێویست دەکات قسە دروست بکەن وبیدەنە پاڵ قورئان، کە هیچ لە قورئانیش ناچێت؟! لەناو دوو بەرگی قورئانیشدا نییە؟!

- زینای پیرەمێرد و پیرەژن!!

ئینجا باسی حەدیسێکی تر دەکات کە دەڵێت سابتە لە زید بن ثابت گوایە ئایەتێكمان لە کتێبی خوادا دەخوێندەوە دەیگووت: پیرەمێرد و پیرەژن، ئەگەر زینایان کرد بەردبارانیان کەن تا مردن، لەبەر ئەو لەزەتەی لەیەکتریان کرد، وەك سزایەك لە لایەن خواوە، خوا بەهێز و دانایە!!! : الشیخ و الشیخة اذا زنیا فارجموهما البتة بما قضیا من اللذة نكالاً من الله والله عزيز حكيم !!!! یانی ئەوەی بچوکترین تێگەیشتنی هەبێت لە کۆمەڵی ئادەمیزاد دەزانێت، کوڕ وکچی لاو وجاحێڵ ئەگەری دوچاربوونیان بە زینا هەیە لە ٩٩% حاڵەتەکاندا، زۆر بە دەگمەنە پیرەژن وپیرەمێردێك دوچاری ئەو هەڵەیە بن! کەچی بە قسەی ئەو حەدیسە بێت، خودا لە جیاتی ئەو هەموو گەنجانەی کۆمەڵگاکان هاتوە سەرکۆنەی پیرەژن وپیرەمێردان دەکات لەسەر زینا! ئەخر پیرەمێرد و پیرەژن، کەی تاقەتی زینایان ماوە تا بەردباران بکرێن تا مردن؟ دوایی لەزەتی چی لای پیرەمێرد و پیرەژنی داماودا ماوە؟! وەڵلاهی ئەوە نەك قسەی خوا نییە بەو لاوازیەی معنی و مبنی، بەڵکو باوەڕناکەم قسەی صحابی یش بێت، بەڵکو بە قسەی عاقڵێکیش ناچێت، تەنها درۆیەکە لە درۆ لەبن نەهاتوەکانی کتێبەکانی حەدیس.

- بێ سەروشوێن بوونی سورەتێك لە ١٢٩ ئایەت!

هەروەها لە صحیحی بوخاری لە وتارێکی عومری کوڕی خەتاب کە دەڵێت ئێمە کاتی خۆی لە قورئاندا ئەو ئایەتەمان دەخوێندەوە:  الا ترغبوا عن آبائكم ، فانه کفر بکم ان ترغبوا عن ابائکم!!!
لە  صحیحی مسلم هاتوە لە ابی موسی الاشعری  گوایە بانگی زانایانی  بەسرەی کردوە ، ٣٠٠ زانای قورئان بۆی کۆدەبنەوە و پێیان دەڵێت: ئەی زانایانی خەڵکی بەسرە قورئان بخوێنن و فەرامۆشی نەکەن، نەوەك دڵتان ڕەق بێت وەك ئەوانەی پێشوو دڵیان ڕەق بوو!!! ئێمە سورەتێکمان دەخوێندەوە لە درێژی و بەهێزیدا وەك سورەتی البراءة بوو ، ئەوەی لە بیرمە لیی ئەو ئایەتەیە کەدەڵێت: ئەگەر ئادەمیزاد دوو دۆڵی سامان هەبێت، داوای سێیەم دەکات، وتەنها خۆڵ چاو و دەروونی تێردەکات!!!  اتلوا القران ولا تناموا عنه فتقسوا قلوبکم کما قست قلوب من سبقکم!  وانە کان مما نقرا سورة في طول و الشدة مثل البراءة اذکر منها لو کان لابن ادم وادیان من المال لابتغا ثالثا، ولا یملآ جوف ابن ادم الا التراب!!!

دەبێت ابی موسی الاشعري مەبەستی کێ بێت کە دڵیان ڕەق بووە؟! کە دەڵێت: " قورئان بخوێنن و فەرامۆشی نەکەن، نەوەك دڵتان ڕەق بێت وەك ئەوانەی پێشوو دڵیان ڕەق بوو!!!" کە خۆی صحابی بێت دیارە قسە بۆ تابیعیەکان دەکات، پێش تابیعیش هەر صحابە هەن، کەوابوو مەبەستی دڵ ڕەقبوونی صحابەیە!! ئینجا دەڵێت: "ئێمە سورەتێکمان دەخوێندەوە لە درێژی و بەهێزیدا وەك سورەتی البراءة بوو!!" مەبەستی سورەتی التوبة یە کە ١٢٩ ئایەتە و ئاماژەش ناکات چی لێهاتووە، ئایە یەك سورەتی تەواو لەفزەکەی نسخ کراوەتەوە و حوکمەکەی ماوەتەوە؟! ترفع لفظها و تبقی حکمها!!! باشە دەبیت حیکمەت چی بێت سورەتێك لە ١٢٩ ئایەت هەمووی لاببرێت لە قورئان و هێشتا حوکمکەشی مابێت، تەنها شتێکیشی لە بیر مابێت لەو سورەتە مەزعومە ئەو قسەیە بیت: " لو کان لابن ادم وادیان من المال لابتغا ثالثا، ولا یملآ جوف ابن ادم الا التراب!!!" کە ئەوە حوکمیشی تێدا نییە بەڵکوو لە دەیەها پەندی پیشینانی میللەتاندا هاتوە، هەتا لە کوردیش ئەو پەندە هەیە کە دەڵێت: مرۆڤ مەگەر خۆڵ چاوی تێرکات، دەنا چاوی تێر نابێت!! دوایی کوا ئەحکامەکانی تری ناو ئەو سورەتە ١٢٩ ئایەتیە

تۆ وەرە بهێنە بەرچاوت، ئەگەر لە دەرسێکدا مامۆستایەك بێت و بڵێت فەسڵی پێنجەم لە کتێبەکەتاندا داخیلی تاقیکردنەوەیە و کەچی کتێبەکەش خۆی هەر چوار فەسڵە! چەند ساڵێک بەرلەوان داخیلی ئیمتیحان بوە و لە کتێبەکەدا هەبوە، بەڵام لە چاپی نوێدا ئەو  فەسڵە دەرکراوە، بەڵام حوکمیشی هەرماوە و لێی بەرپرسیارن لە تاقیکردنەوەدا!!!! دەبێت کاردانەوەی ئەو قوتابیانە چۆن بێت بەرامبەر بەو مامۆستایە؟! بێگومان لێی توڕە دەبن و تاوانباری دەکەن بە خەڵەفاوی، چونکە کە کاری پێدەکرێت بۆچی ناهێڵیت لەبەر چاوی خەڵك بێت تا ئەحکامەکانیان بیر بێتەوە؟!! لە کێ ڕوویداوە کە لەفز نەسخ بکرێت و حوکم بمینێت، ئایە نابێت حوکم لەفزێکی هەبیت بخوێندرێتەوە وبەڵگە بێت لەسەری؟! ئەگەر لەفز نەسخ کراوە کوا بەڵگەی ئەو حوکمە، ئایە حوکم تابیع وسەر بە لەفز نییە، ماقوڵە تابیع بمێنیت و ئەسڵ هەڵبگیرێت؟!
ئەو جۆرە نەسخ کردنە تەنها داهێنانێکە دەتوانین بڵێین بیدعەیەکە دەبوایە ئەهلی موحارەبەی بیدعە زیاتر خەریکی شەڕی ئەو بیدعەیە  جەوهەریانە بان کە گومان دەخەنە قورئان و کەسایەتی زۆر گەورەی ناو ئیسلام، نەک خەریکی  پانتۆل کورت کردن و ڕیش بەردان وسمێڵ قرتان! کێشەی ئەو برادەرانە ئەوەیە لە پێناو بە درۆنەخستنەوەی حەدیسێك  وتانە نەدان لە کتێبەکانی حەدیس و ئەوانەی دەیگێڕنەوە، ئامادەن گۆمێك خوێن بڕێژن و گومانیش بخەنە قورئان، بەڕاستی سەفقیەکی دۆڕاو دەکەن!

ئەوە لینکی ڤیدیۆکەیە:
https://www.youtube.com/watch?v=Otbp2_UrqaI


ليست هناك تعليقات:

إرسال تعليق