مەدخەلیەکان: خەواریجی دیندار وئازادیخوازان ومورجیئەی دەسەڵاتداران

مەدخەلیەکان: خەواریجی دیندار وئازادیخوازان ومورجیئەی دەسەڵاتداران 28/9/2013محهمهد ههریری ئەمڕۆ جیهانی ئیسلام دووچاری دەرهاوێشتەیەکی سەقەتی تری فیکری سەلەفی هاتووە، لە ژێر ناونیشانی مەدخەلیەکان یان جامیەکان. فیکری ناهەوسەنگ بەوە دەناسرێتەوە کە هەردەم پەرگیرە یان لەو پەڕی توندی دایە یانیش لەوپەڕی نەرمکێشی تا ڕادەی خۆ بەدەستەوەدان. ئەگەر لەو هاوکێشەیە قاعیدە وهاوشێوەکانی ئەوسەری توندرەوی بگرن بەکارە توندوتیژەکانیان، ئەوە مەدخەلیەکان لاکەی تری هاوکێشەکە دەگرن بە خۆ خستنە بەر خزمەتی دیکتاتۆر وفیرعەونەکان بە کەمالی ئاسودەیی ویژدانەوە.!  سەرهەڵدانی ئەو فیکرەیە وەك ئاڕاستەیەك دەگەریتەوە بۆ ساڵانی ١٩٩١ لە کاتی روداوەکانی داگیرکردنی کوێت لەلایەن سوپای عێراق، کاتێ سعودیەش هەستی بە هەڕەشەی سوپای عێراق کرد، لە مەتبەخی موخابەراتی سعودی ئەو جەماعەتە دروستکرا لەسەر دەستی کابرایەکی ئەسیوبی [حەبشی] بە ناوی محمد امان الجامي کە بە دان پیهینانی لایەنگر وخودی مەدخەلیەکان هەر خەریکی ڕاپۆرت نوسین بوە لە دژی شێخەکانی تری هێڵی چاکسازی لەوانەی رەخنەیان هەبوو لە دەوڵەت وهەوڵی چاکسازیان دەدا، بۆیەش کاتێك پرسیار دەکەن لە عبدالعزیز العسکری مەدخەلی لە کاستێکی تۆمارکراودا دەربارەی حوکمی کارکردن لەگەڵ موخابەراتدا: لە وەڵامدا دەڵێت: جا زیانی چیە ئەگەر لە موخابەرات کارت کرد ودەوڵەتت پاراست لە تێکدەران وخاریجیەکان [مەبەستی ئەوانەی باوەریان بە خروج دەرکەوتن هەیە لە دژی دەوڵەت]!! خۆزگە موخابەرات ودەزگا جاسوسیەکانی خۆرهەڵات لە پیناو بەرژەوەندی خاك ونیشتیمان وهاوڵاتی دەبوون، ئەو کاتە دەکرا لەو حەماسەتە تێبگەین بۆ کارکردن وەك جاسوس وڕاپۆرت نووس، بەڵام کەس نیە نەزانێت بە مەدخەلیەکانیەوە کە ئەو دەزگایانە کاریان تەنها پاراستنی حاکم ودەسەڵاتدار وسەرکوتکردنی میللەتە، خەڵک دەناسم ئەوەی خراپە وهەولێری گۆتەنی خوا پێی ناخۆشە دەیکات بەڵام بای هێندە نەفسیەتی بەرزە کە بە گەورەترین ئیغراوەش نەبێتە جاسوس بەسەر ئازادیخوازان.  ڕاستە هەندێك لە بیروباوەڕی مەدخەلیەکان سەرچاوەی تیۆری مێژوویی هەیە وەك مەسەلەی تەحریمکردنی دەرچون لە دژی سولتان هەتا ئەگەر زاڵم وفاسیقیش بێت، وهەتا ئەگەر هەموو مال وسامانیشی لێسەندی ودارکاری وقامچیکاری پشتیشی کردی، بەڵام مەدخەلیەکان ئەو بیرۆکانەیان هێندەی تر دزێو وناحەز کردوە کاتێك لە سیاقی مێژوویی خۆیانیان دەرخستوون ولەسەر حاڵەتێك یەکجار جیاواز جێبەجێی دەکەن، واتە بە کەرەستەی کۆن چارەسەری کێشەی نوێ دەکەن، بۆ نموونە ئەگەر سەلەفیەکانی بەرایی تەحریمی خروجیان دەکرد لە دژی سوڵتانەکان بۆ پاراستنی یەکڕیزی ئۆمەتی ئیسلام، هەرنەبێ ئەو سوڵتان ودەسەڵاتدارانە سەرەڕای جەور وستەمیان، بەڵام شەریعەتیان بە یاسای خۆیان دەزانی و لەوش گرنگتر ئەو کاتە فەرمانڕەوایانی جیهانی ئیسلام سەربەخۆ بوون هیچ دەستێوەردانێکی دەرەوەیی وەك ئێستا کە لەبەر ئەو دەستێوەردانەی زلهێزەکان لە زۆربەی خاکی وڵاتانی جیهانی ئیسلامدا کەسانێك حوکم ناکەن بە ویستی خەڵک بن. ئەگەر دەرچوون حەرام بێت لە دژی فەرمانرەوا هەرچیشی کرد، کەوابوو دەبێت ئەو مەدخەلیانە یەکەم جار دەرچوونی ئیمام احمدی کوڕی حەنبەل لە دژی دەسەڵاتی خەلیفەی عەباسی ئیدانە بکەن کە سەرەڕای بوونی هۆکارێکی زۆر بۆ دەرچوون لە دژی جەوروستەمی عەباسیەکان، کەچی ابن حنبل لە پێناو کێشەیەکی لەفزی وتەرەفی وەك کیشەی [خلق القرآن] دەرچوو، هێندە خەڵکی هاندا لە دژی موعتەزیلەکان نەیان هیشت ئیسلام بە قۆناغی عەقڵانیەتی مێژوویی تێپەڕێت، هەرچەندە موعتەزیلەش بێ گوناه نەبوون، وگەورەترین گوناهیان لە جیاتی دەیەها وسەدەها بواری پیویست بە گۆڕان هاتن لەو کێشە بێ ئەرزشەوە دەستیان پیکرد، وخەلکیان لەسەر ئەزیەت دەدا وچەندەها قارەمانی ساختەیان لەو پیناوە دروست کرد!  مەدخەلیکان ئەمڕۆ بە ساویلکەیەکی لە ڕادەبەدەر هاتونەتە ناو گۆڕەپانی ڕوداوەکان ناشیرینترین ڕۆڵ دەینن لەو کێشمەکێشەی لە نێوان گەلان ودیموکراتخوازان لەدژی گەندەڵکاران وستەمکاران دەبینن. وەك لە ناونیشانی ئەو وتارە ئاماژەمان پێکردوە، مەدخەلیەکان وەک خەواریجن لە دژی دیندار وئازادیخوازان وئەوانەی هەوڵی گۆڕینی سیستمی دیکتاتۆریەت وشمولیەت دەکەن، وبە توندترین شێوە هێرشیان دەکەنە سەر ودەسەڵات هاندەدەن لە دژیان، وهەتا ئەگەر دیندارەکان لە دەسەڵاتیش بوون ئەوان بە ئیعازی موخابەراتی سعودی لە دژیان دەوەستنەوە وەك چۆن لە دژی مورسی وەستانەوە لەناو ئەو هەموو وەلی ئەمرە فەرمەسۆنانە بەس مورسی یان بە وەلی ئەمر نەزانی، بە پێچەوانەی تەحریمکردنیان بۆ دەرچوون لە دژی وەلی ئەمر، ئەوان لە ریزی پێشەوەی کودەتاچیەکان بوون لە دژی وەلی ئەمریان، چونکە ئەوەی ئەوان دەجوڵێنێت دین وحەدیس وسونە نییە، بەڵکو فەرمانەکانی موخابەراتی سعودیە! ئێستا داویانەتە پاڵ کودەتاچیەکان وسیسی بە وەلی ئەمر دەناسێنن، وبەوپەڕی بێویژدانیەوە هانی دەدەن بۆ کوشتنی خەڵکی دژ بە کودەتا! مورجیئەن بۆ دەسەڵاتداران لە نەرم ونیانی وهینانەوەی هەموو عوزرێك بۆیان، با هەر تاوانیکیش ئەنجام بدەن دژی مرۆڤایەتی ودینیش، کەچی لای ئەوان هەر وەلی ئەمر وتاعەتی واجیبە وحوکمی سەرکەوتوو بە هێز واجیبە ورەوایە. هەر بۆیەش ئەمڕۆ دیکتاتۆر وسەرۆك حزبەکان لە هەر شوێنێك بن ئەو مەدخەلیانەیان تەبەنا کردوە وپیسترین کاریان پێدەکەن لە ڕاپۆرت نوسین وبەگرتدانی خەڵكدا، تەنانەت بە کەمالی دەبەنگی وچڵکاوخۆریەوە وردترین ڕاپۆرت پێشکەشی کۆنفراسی وەزیرانی ناوخۆی وڵاتانی عەرەب دەکەن کە تەنها دەزگای موخابەراتین!  شوهرەتی خەدەماتی خۆفرۆشیان هێندە ناوبانگی داوەتەوە سەنتەری قەڵاچۆکردنی تیرۆریزمCombating Terrorism Center تەوسیە دەکات بۆ حکومەتی ئەمریکا بۆ پاڵپشتیکردنی مەدخەلیەکان وبەکارهێنانیان لە شەڕی دژی تیرۆریزم!!  http://www.ctc.usma.edu/ لە کورستانی عێراقیس ئەمرۆ ئەو پەتایە مەدخەلیانە دەرکەوتوون وەك مامۆستا سعودیەکانیان هەمان پۆخڵەواتی ئەوان وخۆفرۆشی ئەوان ودەبەنگی ئەوان دوبارە دەکەنەوە، وەك کۆیلەی بێ بەها وبێ ساحێب دابەش بوونە بەسەر دوو حزبی دەسەڵاتدار وبانگەشەیان بۆ دەکەن وخەڵك سارد دەکەنەوە لە هەوڵی گۆڕینی وەزعەکە ودەسەڵات زیاتر هان دەدەن بە قسە سوەکانیان کە پڕاوپرن لە زەلیلی وخۆبەدەستەوەدان وهەقی موتڵەق پێدانیان، ئەگەر بە دەست ئەوان بێت جەوێکی سوڵتانی دەخوڵقێنن کە تیایدا هەموو شتێك حەرامە: حزبایەتی وهەڵبژاردن وسنوردارکردنی سەرۆکایەتی ورەخنەگرتن بە ئاشکرا وهەتا دوایی. ئەگەر مەدخەلیەت لەناو عەرەبدا دژی هەقیقەتی دین بن، ئەوا لەناو کوردا دژی ئەخلاق وڕەوشتی کوردیشن کە دژە بە سەرشۆڕی وجاسوسیەت وماستاو کردن بۆ دەسەڵاتدارانن.

نابۆ بە سعودی کردنی ئافرەتانمان

نابۆ بە سعودی کردنی ئافرەتانمان

محەمەد هەریری

یەکێك لە ماڵپەڕە سەلەفیەکان تەرخان کراوە بۆ بانگەشەکردن بۆ نیقاب بەستنی ئافرەتی کورد بەناوی: بهڵێ بۆ نیقاب لهكوردستان، دەیانەوێت وەك کۆمەڵگا سعودی وخەلیجیەکان ژنان وکچانی کورد دەیان هەنگاو وەك میزی حوشتر بۆ دواوە بگەڕێنەوە، ئەوەش لە نێو موفرەداتی ئەو پڕۆژە نەگریسەی سەلەفیەکانە بۆ بە سعودی کردنی کۆمەڵگای کوردی.
بەهێزترین خاڵی ئەو پرۆژەیە ئەو هەموو ماستاچیاتیە وخۆهەرزانفرۆشییەیە بۆ دەسەڵاتداران لە هەر شوێنێك بن. زۆر بە جیدی دیفاع لە دەسەڵتداران دەدەن ودەیان تۆقێنن بە چەندین دەق وفەهمی سەقەت کە نابێت هیچ رەخنەیەکت هەبێت لە دەسەڵاتداران، وحزبایەتی جائیز نیە، خۆپیشاندان جائیز نیە، وگردبوونەوە جائیز نیە واعتصام جائیز نیە. ئەی دەسەڵاتداری گەندەڵ چی دەوێت زیاتر لەو کۆمەڵگا ملکەچ و کەرەی وەك کۆمەڵگای سعو+دی تا سواری پشتی بێت. من گومانم نیە کە هەموو دەسەڵاتدارانی دنیا هەتا بە ناموسڵمانەکانیشەوە هیوای کۆمەڵگایەکی سەلەفی مەدخەلی مەشرەب دەخوازن، لە پێناو مانەوەیان وحوکمکردن بەوپەڕی ئاسودەیی.
لەو پەیجەی کە بۆ بانگەشەی نیقابکردنی ئافرەتی کورد کراوە، دەیانەوێت بە بیری چڵکاوخۆریان ئافرەتی کورد تەنازول بکات لەو کەمە مافەی کە وەریگرتوە وبگەڕێتەوە بۆ سەردەمی پەچە وعەبا ونیقاب، ووەک ئافرەتە ەستەزمانەکانی سعودیە بۆیان نەبێت بەبێ پیاو هەتا موراجەعەی فەرمانگ حکومیەکانیش بکەن، وبۆیان نەبێت ئۆتۆمبیل لێخوڕن، بۆیان نەبێت ئەگەر هەزار ستەمیانیش لێکرا دەنگیان هەڵبڕن چونکە دەنگی ئافرەت عەورەیە، بۆیان نەبێت بەبێ موافقەی مێرد وباوك وبرایان ئەگەر بچوکتریش بێت سەفەر بکەن یان هەرکارێکی تر. دەیانەوێت وەك ژنە سعودیە قەڵە وپڕ نەخۆشیەکانی سعودیە لەماڵەوە زیندانی بن وهەموو ئاوات وخەونیان بە گەڕانەوەی مێرد ومنداڵەکانیان بێت. دەیانەوێت بەناوی غیرەت وپاراستنی شەڕەف وچەندین قسەی قۆڕتر کۆتێکی زێڕینی لە دەست وپێی ئافرەتانمان کەن وپەچەیەکی ڕەش وعەبایەکی ڕەش ونیقابێکی قەترانی بخەنە سەر ڕوخساری ئافرەتانمان کە بە نوێژی نیوەڕۆ جیهانیان بۆ بەڕەش نیشاندا. سەیرم بەو عەقڵیەتە گاڵتەجاریە دێت، لەکاتێکدا لەنێو سەلەفیەکان وزانایانیشیان نیقاب جێگەی ئیختیلافە، هەتا الالباني وەك یەکێك لە زانایایە هەرە توندەکانیان کتێبێکی نوسیوە بە ناونیشانی: الرد المفحم، على من خالف العلماء و تشدد و تعصب، و ألزم المرأة بستر وجهها و كفيها وأوجب، و لم يقتنع بقولهم: إنه سنة و مستحب. واتە: [وەڵامی دەمکوتکەر بۆ ئەونەی پێچەوانەی زانایان دەکەن وتوندرەوی ودەمارگرژی دەکات وئافرەت پابەند دەکات بە داپۆشینی دەموچاوی وهەردوو دەستی وبە واجیبی دەزانێت، وقەناعەتی بە قسەی زانایان نیە کەوا سونەیە وموستەحەبە] ئەو کتێبە هەر ناونیشانەکەی ئینشایەکە بۆ خۆی، ولە لەبارترین حاڵەتدا ئەلبانی دەڵێت سونە وموستەحەبە وبە هیچ جۆرێك واجیب نیە، باوەڕبکەن ئەو کتێبەی ئەلبانی لە زۆر لە سایتە زۆرۆ وبۆرەکانی سەلەفیەت دەست ناکەوێت، چونکە من خۆم گوێم لە ڕەخنەی سەلەفیان بوە لەسەر ئەو کتێبەی ئەلبانی. ئەوە باسی بیروڕای زانانی دەرەوەی بازنەی سەلەفیەت هەر ناکەین کە زۆربەی هەر زۆریان پێیان سونەت وموستەحەبیش نیە، نەك واجیب. بۆیە پێویستە لەسەر خەمخۆرانی ئیسلامی میانڕەو وئەوانەی نایانەوێت مەملەکەتێکی سعودی بەدەوی دواکەوتوو وپیس وپەڵۆس لە ڕووی فیکری وڕوحیەوە ببینن لە کوردستان، گەنج وئافرەتانمان توشی داوی ئەو رەجعیەتە مەزهەبی نەکەن، پێویستە چالاکیەکی رۆشنفکری ووریاکردنەوەیەکی ئایینی میانڕەو هەبێت لە بەرامبەر ئەو هەوڵە نەبراوانەی بە سعودی کردنی کۆمەڵگای کوردی.
محەمەد هەریری

فرەژنی مۆدەی گەندەڵ و ئیسلامیەکان!

فرەژنی مۆدەی گەندەڵ و ئیسلامیەکان!

محەمەد هەریری

بۆ ئەوانەی کەلکەلەی فرەژنیان هەیە، یان هەر ژنیان کەمێك کاریگەری زەمەنی کەوتە سەر روخساری بیر لە هێنانی ژنێکی تر دەکەنەوە وەك بڵێیت سیارە بگوڕن!! بە تایبەتی نێوەندی ئیسلامی ئەوەی دەگریت کەمێك خەڵک پیی سەرسام دەبن ودووسێ خوتبەی حەماسی ویەك دوو شەڕی دۆنکیشۆتی دەکەن، یەکسەر دەکەونە چاوگێڕان بۆ مثنی وثلاث ورباع! زۆر سەیرم پێهات کە ئەو بەیانیە لە کۆمێنتێکدا زۆر سەیرم پێهات بەڕێزێك لەسەر د. عبدالواحدی بانگخواز نوسیبووی: " دەستخۆش ....، کەس وەک من ئەم دکتۆرەو براکەی د.خالید کە ئەویش هەمان بانگخوازی ئیسلامیە نا ناسێت. ئەمانە هێندە جاهیلن، کێبركییانە لە گەڵ یەکتریدا کامیان زۆرترین ژن بهێنێت، ئەم دکتۆرە ئیسلامیە، ئێستا ٤ ژنی هەیەو براکەشی کردویەتی بە ٢ دوانو هەڕەشەی ئەوە دەکات کە پێش کاکی واتا عەبدول واحید بکەوێت.هههههه" بەڕاستی لەوە ئاسانتر نیە بۆ کەسێك کە کەمێك ناوبانگی دەرکرد لە ناو ئەو جەماوەرە دینیە سادەیە دوو و سسێ وچوار ژن بهێنێت، نەك ئەوە زۆرجاران پاش دەماغشۆری ژنەکانی تری خۆیان بۆی دەچنە داخوازی ژنی دوەم وسییەم وچوارەم!! لەوەش ئاسانتر نیە ژنێکی بەستەزمانی نیمچە خوێندەواری سەرسامبوو پێت دەماغشۆر کەیت، بەڵام ئەوە هونەر نیە، هونەر ئەوەیە ئەو ژنە هاندەیت لە ڕووی دەرونی وکەسایەتیەوە ئیرتیقا کات وبەرزبێتەوە نەك نزمی کەیتەوە بۆ ئاستی بوونە پاسەوانی ئارەزووەکانت بە زەبری هەڕەشەی ئایەت وحەدیسەکان!! هونەر ئەوەیە وەك چۆن ژنت بەتۆ ڕازیە وبیر لە کەسێکی جوانتر وگەنجتر ناکاتەوە، تۆش بە هەمان شێوە احترامی هەست ووەفای ئەو بگریت، بیر لە کچێکی جوانتر وبچوکتر نەکەیتەوە تا ئەو هیچ نەنگیەکی نەبێت وبێ کەم وکورتی بێت. کە دەڵێم کەموکورتی ئەوەیە بۆ نمونە منداڵی نەبێت، ئەگەر پێتکرا لەو حاڵەتەش بە شیوەیەکی پڕ وەفا وتقدیر رەفتاری لەگەڵ بکەیت، یان تووشی نەخۆشیەکی وا بوو هیچ ئەرکێکی مرۆیی پێ جێبەجێ نەکرا، ئەگەر نەخۆشیەکەی چاوەڕوانی مردنێکی نزیك خایەنی لێدەکرا، نابێت لە ژیانی ئەودا بەبەرچاوی ئەو ژنێکی تر بهێنیت وتانەیەکی کوشندەی لێدەیت بەرلە چونە ناو قەبرەوە. ئەگەر نەخۆشیەکەش درێژ خایەن بوو دەتوانی پاش تەمهیدێکی جوان وپڕ سۆز ئەو بابەتەی لا بوروژێنیت. من کە ژیانی فرەژنی پێغەمبران دەخوێنمەوە ولەنێو ئەوانەش پێغەمبەری ئیسلام [د.خ] دەبینم بەردەوام لە کێشەی هەوێیەکاندا خەریکی جارەسەرکردنی کێشەکانیان بوو، بەڕاستی سەیریشم بەوە دێت چۆن دەعوەی ئیسلامی ناجیح بوو سەرەڕای ئەو هەموو ژنەی پێغەمبەر!! چۆن ئەو کێشانەی غیرە ولەیەکتر خوێندن ومونافەسەیە سێ چارەگی کاتی نەکوشت، ئەوە حاڵی پێغەمبەر بوو بەو هەموو تایبەتمەندیە کەسایەتیەی کە هەیبوو وەك پێغەمبەر ومرۆڤ، ئەی دەبێت حاڵی ئەو بانگخواز وڕۆشنیرە ئیسلامیانە چۆن بێت بە دەستی کێشەکانی فرە ژنییەوە. ئینجا ئەگەر فرەژنی بۆ کات وژینگەی مێژوویی خۆی ئاسایی بوو، ئەوە بێگومان بە هیچ جۆرێك لەگەڵ ئیقاعی ئەو سەردەمە ناگونجێت، زۆرجار ئەو حاڵەتەی فرەژنیە دەبێتە هۆی بچوککردنەوەی ئافرەتەکان ولەجیاتی خەریك کردنیان بە بایەخە بەرزەکان وئامانجە گەورەکان، هەرخەریکی داونانەوە دەبن بۆ یەکتر وپلان دانان دەبێتە کاری ڕۆژانەیان ودەیان دەسیسە وئاین وئۆنی تر. فرەژنی هەر نابێتە هۆی بچوك کردنەوەی ژنەکان، بەڵکو دەبێتە هۆی بچوك کردنەوەی پیاوەکانیش، کە هێڕ وگێژ دەبێت بە دەست ئەو زنجیرە پیلان وداونانەوە وخوهتان هەڵبەستن بۆ یەکتر وتا کۆتایی ئاین وئۆینەکان!! پێشان هەر نیمچە خێڵەکی وفول عەشایەریەکان خەریکی ئەو بەزمەی فرەژنیە بوون، ولە هەشتاکان ببوە بەزمی سەرەك جاش وموستەشارەکان، ئەمڕۆ بە داخەوە فرەژنی بۆتە بەزمی مەسولە گەندەڵەکان وئیسلامیە نیمچە بوژاوەکان لە گەندەڵیدا، بەڵکو رۆشنبیرەکانش تێی ئاڵاون، کاتێ بە قسە بریقەدارەکانیان کچانی هەرزەار وبێ ئەزموون دەخەنە داویان.

محمەد هەریری

٢٥/١٢/٢٠١٣

لەندەن