الاثنين، 30 يناير 2012


ده‌ستاوده‌ست پێكردنی‌ ده‌سه‌ڵات و کەڵەشێرەکەی نەزار قەبانی

محەمەد هەریری
hariri66@yahoo.com

 
 
لە هەواڵیکدا کە سایتی ئاوێنه بڵاوکردۆتەوە و لە رۆژنامه‌ی چاودێر وەریگرتوە به‌بۆنه‌ی‌ پێكهێنانی كابینه‌ی‌ نوێی‌ حكومه‌تی هه‌رێمی كوردستانه‌وه‌، لێپرسراوی‌ ده‌سته‌ی‌ كارگێڕی‌ مه‌كته‌بی سیاسی یه‌كێتی‌ نیشتیمانی‌ كوردستان مه‌لا به‌ختیار، په‌یامێك ئاڕاسته‌ی‌ نێچیرڤان بارزانی‌ ده‌كات.
مه‌لا به‌ختیارلەو پەیامە پرسیارێکی زۆر هەستیار دەوروژێنێت کاتێ به‌ نێچیر‌ڤان بارزانی ده‌ڵێت: " له‌م دوو هه‌فته‌یه‌دا، پێده‌چێت، كابینه‌ی‌ شه‌شه‌م، به‌ كابینه‌ی‌ حه‌وته‌م، له‌چوارچێوه‌ی‌ چوار ساڵ‌ ده‌ستاوده‌ست پێكردنی‌ ده‌سه‌ڵات له‌نێوان یه‌كێتی‌‌و پارتیدا، بگۆڕدرێت. ئه‌مه‌ش به‌پێی‌ راده‌ی‌ پێشكه‌وتنی‌ ئه‌زمونی‌ دیموكراسیمان، سه‌ره‌تایه‌كی‌ باشی‌ ده‌ستاوده‌ست پێكردنی‌ ده‌سه‌ڵاته‌. به‌ڵام هێشتا به‌ چه‌مكه‌ دیموكراسیه‌ فراوانه‌كه‌ی‌، یه‌كێتی‌‌و پارتی‌ ماویانه‌، له‌ دوا مه‌حه‌كی‌ ده‌ستاوده‌ست پێكردنی‌ ده‌سه‌ڵات بدرێن. ئه‌ویش ته‌نها ئه‌وه‌یه‌، جگه‌ له‌ خۆیان، ئاخۆ له‌ هه‌ڵبژاردنێك له‌ هه‌ڵبژاردنه‌كاندا، هێزێكی‌ براوه‌ی‌ دیكه‌ بۆ سه‌ر ده‌سه‌ڵات قبوڵ ده‌كه‌ن یان نا؟"
بۆ وەڵامی ئەو پرسیارە هەستیارە دەبوایە بەر لە نێچیرڤان ئاڕاستەی بەرهەم ساڵح کرابایە هەرچەندە مەرامی جەنابت لە بارەی ئەو پرسیارە وروژاوە ڕوون نییە، چونکە هەموومان قەبارەی نەفەسی دیموکراسی ئێوە وەک مەلا بەختیار و وەک یەکێتی و وەک پارتی هاوپەیمانی ستراتیژیتان دەزانین، دەکرێت ئەو لێدوانە لە چارچێوەی موشاکەسەی سیاسی بخوێندرێتەوە، وەڵامێکیش بێت بۆ موشاکەسەکانی فازیل میرانی کە ئەگەر سەرکردایەتی پارتی بێدەنگی نەکات لەوانەیە کێشەی زۆر گەورەتر بۆ پارتی بخولقێنێت، چونکە وەک خۆت لە نامەکەدا دانی پێدا دەنێیت: " به‌ڵام هێشتا به‌ چه‌مكه‌ دیموكراسیه‌ فراوانه‌كه‌ی‌، یه‌كێتی‌‌و پارتی‌ ماویانه‌" ئێوە وەك دوو حزبی قۆرخکەری دەسەڵات نەك بە تەنها دەسەڵاتتان قۆرخ کردوە، بەڵکو هەموو وڵاتەکە وخاکەکەیی و چارەنووس و سامانیتان قۆرخ کردوە، زۆر زەحمەتە چاوەڕوانی ده‌ستاوده‌ست پێكردنی‌ ده‌سه‌ڵات بکەین لە دەرەوەی دوو زلهێزەکەدا، ئێوە وەک دوو برای سەیر دێنە بەرچاوم کە لە منداڵی لەبارەیانەوە دەمبیست کە پەیوەندیەکی نامۆ دەیانیبەستەوە، ئەو دوو برایە بەردەوام پێکەوە بوون، پێکەوە نانیان دەخوارد، پێکەوە لە منداڵی تریان دەدا، پێکەوە ڕاوەڕوتیان دەکرد و پێکەوە یاریان دەکرد، زۆر شەڕاوی بوون زۆربەی منداڵانی کۆڵانەکەیان تۆقاند بوو، ئەو دوو برایە ناوە ناوە وەردەگەڕانە سەر وگێلاکی یەکتر یەکتریان شل وکوت دەکرد، هەر کەسێك سەری بەرزکردبایەوە ئەوە هەموو ناکۆکیەکانیان دەخستە لاوە لە پێناو ئامانجە ستراتیژیەکەیان کە ئەوان بە تەنها کەڵەشێری کۆڵان بن بە تەعبیری شاعیری مەزن نەزار قەبانی لە شیعرێك بەناونیشانی [في حارتنا دیك] کە من لێرەدا بە پێویستی دەزانم هەوڵی وەرگێڕانی بەشێک لە ماناکەی دەکەم، هەرچەندە زەحمەتە ئەو زمانە بەرز وموزیکیە تەرجەمە بکرێت:
في حارتنا
ديك سادي سفاح
ينتف ريش دجاج الحارة ،
كل صباح
ينقرهن، يطاردهن، يضاجعهن، ويهجرهن
ولا يتذكر أسماء الصيصان 
[لە گەڕەکەکەمان، کەڵەشێرێکی سادی خوێنڕێژی ملهوڕ، پەڕوبالی مریشکەکانی کۆڵانەکە دەکات بە گوڕ، هەموو بەیانیەک، دەنوکیان لێدەدات، ڕاویان دەنێت، لەگەڵیان دەخەوێت، تڕۆیان دەکات، کەچی هەتا ناوی جوجەڵەکانیشی لە بیر دەکات]
في حارتنا
ثمة ديك عدواني ، فاشيستي ،
نازي الأفكار
سرق السلطة بالدبابة
ألقى القبض على الحرية والأحرار
ألغى وطنا
ألغى شعبا
ألغى لغة
ألغى أحداث التاريخ
وألغى ميلاد الأطفال
و ألغى أسماء الأزهار 
[لە گەڕەکەکەمان، هەیە کەڵەشێرێکی فاشستی دوژمنکار، نازی لە بیر و ڕەفتار، بە زەبری تانك دەسەڵاتی دزی، ئازادی وئازادیخوازانی خستە زیندانی ژێربار، وڵاتی سڕیەوە، گەلێکی سڕیەوە، زمانێکی سریەوە، ڕوداوەکانی مێژووی سڕیەوە، سڕیەوە ساڵیادی منداڵان ، سڕیەوە ناوەکانی گوڵان]

في حارتنا
ثمة ديك أمي
يرأس إحدى الميليشيات 
لم يتعلم 
إلا الغزو و إلا الفتك 
و إلا زرع حشيش الكيف 
وتزوير العملات 
كان يبيع ثياب أبيه 
ويرهن خاتمه الزوجي 
ويسرق حتى أسنان الأموات 
[ گەڕەکەکەمان، کەڵەشێرێکی نەخوێندەواری لێیە، سەرۆکایەتی میلیشیایەک دەکات، هیچ نازانێت، جگە لە شەڕ وغەزا وزەفەر پێبردن، جگە لە چاندنی حەشیشی کەیف وڕابواردن، جگە لە دراو تەزویرکردن، کەڵەشێری ناوبراو پۆشاکی باوکی ئەفرۆشیەوە، ئەڵقەی هاوسەری دەخستە بارمتەوە، هەتا دانی مردوەکانیشی دەدزیەوە]
كيف سيأتي الغيث إلينا ؟
كيف سينمو القمح ؟
وكيف يفيض علينا الخير ، وتغمرنا البركه ؟
هذا وطن لا يحكمه الله
ولكن تحكمه الديكه
[ چۆن هاناو فەرەجمان پێدەگات، چۆن گوڵە گەنمەکان نەشونما بکات، چۆن خێر وبەرەکەت چوار دەورمان دات، کە ئەو وڵاتە خودا حوکمی ناکات، بەڵکو کەڵەشێر بەڕێوەی دەبات]
في بلدتنا
يذهب ديك يأتي ديك
والطغيان هو الطغيان
يسقط حكم لينيني
يهجم حكم أمريكي
والمسحوق هو الإنسان

[ لە شارۆچکەکەمان، کەڵەشێرێک ئۆغر دەکات ویەکێکی تر بەدوایدا سەر دەردەکات، بەڵام جەور هەمان جەور، حوکمی لینینی دەڕوخێت، حوکمی ئەمریکی دەرگامان لێ دەگرێت، لە هەر بارێکدا ئادەمیزادە لەو نێوە دەهاڕدرێت]
بێگومان ئەوە چەند کۆپلەیەکی ئەو شیعرە بەرزەیە بۆ گوێکرتن لە تەواوی شیعرەکە بە دەنگی ئەفسوناوی نەزار قەبانی کلیک لەسەر ئەو لینکە بکە:

جا ده‌ستاوده‌ست پێكردنی‌ ده‌سه‌ڵات چۆن دەکرێت لە عەقڵیەتی حزب گەلێک کە خۆیان بە خاوەنی مێژووی گەلێك بزانن سەرەڕای هەموو ئەو نەهامەتیانەی بەسەر ئەم میللەتەیان هێناوە؟!
ده‌ستاوده‌ست پێكردنی‌ ده‌سه‌ڵات چۆن دەکرێت لە عەقڵیەتێك پێی وا بێت کە لە بەرزەکی دەسەڵات دابەزی جارێکی تر ناهێڵن سەرکەوێتەوە؟!
ده‌ستاوده‌ست پێكردنی‌ ده‌سه‌ڵات چۆن مومکینە بکرێت کە نە سوپا و نە پۆلیس و نە دەزگا موخابەراتیەکان هی نەتەوە نەبن وسەر بە حزب بن؟!
ده‌ستاوده‌ست پێكردنی‌ ده‌سه‌ڵات چۆن دەکرێت هێشتا کار بۆ ئەو فەرهەنگە نەکرابێت، دوو حزبەکەی دەسەڵات بەو پەڕی دردۆنگیەوە دەڕوانێتە حزبەکانی تر و هەموو هەوڵ و تێکۆشانی بۆ دەستەمۆ کردنی نەیارەکانی دەخاتە گەڕ، ئەگەر توانی پەلکێشی بکات بە خۆشی وترشی حزبەکە لە بەرچاوی جەماوەر دەڕوخێنێت ولاوازی دەکات و ئینجا تڕۆی دەکات. ئەوە وەنەبێت حزبەکانی تریش هەمان نەخۆشیان نەبێت بەڵام لە چەند وردەکاریەکدا لێک جیاوازن.
ده‌ستاوده‌ست پێكردنی‌ ده‌سه‌ڵات دەکرا ببوایە واقیعێک ئەگەر کاری بۆ کرابایە لەو ڕۆژەوە کە ئەو دەسەڵاتە لە کوردستانی باشوردا دامەزراوە ئەگەر لەژێر دەسەڵاتی فەرهەنگی حزبی ڕۆژهەڵاتی ڕزگارتان بوایە، ئەگەر لە جوغزی بە پیرۆز کردنی سەرکردە وبنەماڵە وخێڵ بتانتوانیبا کەمێک دەرچن، ئەگەر تەنها بۆ جارێک گەندەڵێک یان خاینێکتان لە ناو خۆتاندا سزا بدایە.
کەوا بوو کەڵەشێرەکەی قەبانی بە هەموو مواسەفاتیەوە و سەرەڕای مواسەفاتی تریش کە تایبەتە بە کەڵەشێری خۆماڵی ناتوانێت ده‌ستاوده‌ست پێكردنی‌ ده‌سه‌ڵات بکات، مەگەر بە ڕوکەشانە نەبێت، بەڕای من لە هەر هەڵبژاردنێك ئەگەر هەموو جیهانیش تێیدا چاودێر بێت تیایدا هەردوو حزبەکە دۆڕاندیان لە جیاتی بە دەست دانەوەی دەسەڵات گەورەترین کارەساتی شەڕی ناوخۆی لێدەکەوێتەوە ئەگەر بە هەمان عەقڵیەت بمێننەوە ولۆسەرێك پەیدا نەبێت لە ناویاندا.!

30/1/2012 London

الأحد، 29 يناير 2012


وەستایی کورد لە دۆڕاندنی دۆستەکانی
لە پەڕاوێزی کۆڕەکەی حەسەن عەلەوی لە سلێمانیدا

محەمەد هەریری
hariri66@yahoo.com





ب
ەر لە ماوەیەک نوسەر وبیرمەندی عێراقی حەسەن عەلەوی هاتە کوردستان بۆ ئەنجامدانی چەند چالاکیەکی سیاسی، لە نێو ئەوانەشدا بەستنی چەند کۆڕێک بوو لە شارەکانی کوردستان و لەنێویاندا کۆڕێکی لە سلێمانی بەستبوو باسی سەرەکی کۆڕەکە هاندانی کورد بوو بۆ جاڕدانی سەربەخۆیی کوردستان ووەک بیرمەندێکی شارەزا بە مێژووی کورد وعێڕاق...
کۆڕەکەی عەلەوی ئێوارەی رۆژی 15/10/2011 لە هۆڵی تەلاری هونەر لەسلێمانی، بەناوی (دەوڵەتی كورد، دواڕۆژەكانی بێدەنگی) سازكردبوو، سەرەڕای ئەوەی کۆڕەکە سەرتاپای تەرخان کرا بوو بۆ زیندوو کردنەوەی گیانی خەوتووی سەربەخۆیی لە مرۆڤی کورددا، بەڵام وەک هەمیشە کە کورد بەشێوەیەکی گشتی زۆر وەستایە لە دۆڕاندنی دۆستەکانی یان هەر لە بنچینەدا موبادەرەی دروستکردنی دۆست بۆ خۆی گەلێک لاوازە هەتا بەراورد ناکرێت بە هەندێک گەلانی خەباتگێر کە لە چاو کوردا سەرەتایین، هەر لەو کۆڕەدا کانی بلیمەتی مەلا بەختیار تەقیەوە وەک مەلایەکی تازە فێری کوردایەتی بوو، وەک بڵێی هەموو ئەو قسانەی عەلەوی یەک زەرە کاری لێنەکردبێت، وتەریق نە بوبێتەوە وەک بەشێک لەو دەسەڵاتە کوردییەی کە بیرۆکەی دەوڵەتی کوردی کردە خەونی شاعیران وماعیران، لەو كۆڕەدا مەلا بەختیار وەک بەرپرسی دەستەی كارگێڕی مەكتەبی سیاسی یەكێتی، رەخنەی لە حەسەن عەلەوی گرتبو لەبەرامبەر بەكارهێنانی وشەی (الاكراد) لەجیاتی (الكورد)!! حەسەن عەلەوی زۆر پەست ببوو بە ڕەخنەکەی مەلا وهەستابو كۆڕەكەی بەجێهێشت و لەهۆڵەكە چووە دەرەوە، من لێرەدا هەقم بەسەر هەڵسەنگاندنی حەسەن عەلەوی نییە ودلنیاش نیم لە نیازی چونکە لە خوێندنەوەی کتێبەکانی سەرنجی لا دروستکردووم، بەڵام هەقی پێدەدەم کە ئەو کاردانەوەی هەبێت، شیاو نییە ڕەخنەیەکی وا سووک بە ڕووی بیرمەندێکی وا دابدەیت کە هاتوە باسی سەربەخۆبوونی کوردستانت بۆ دەکات جا با بەهەر پاڵنەرێک بێت... بەو جۆرە رەفتارانە دۆستێکی زۆرمان دۆڕاندوە زۆربەی ئەوانەشی بونەتە دۆستمان کەسانی بودەڵە ومفتە خۆرن.
حاڵی مەلا بەختیار وەک نوێنەرێکی دەسەڵاتی کوردی وەک حاڵی ئەو کابرا کوفیەیە کە پرسیاری خوێنی مێشولەی لە ئیبنو لعەباس کردبوو بەر لە زەردبوونی کفنی حەزرەتی حوسێن، کە لە وەڵامدا ئیبنو لعەباس پێی گوتبوو خوێنی حوسێن دەڕێژن وپرسیار لە خوێنی مێشولە دەکەن؟!! بێگومان رەخنە وپرسیارێکی وا لە کاتێکی وا ناکرێت لە کەسێک باسی پێویستی جاڕدانی دەوڵەتی کوردیت بۆ دەکات، ئەو پرسیار و رەخنە هەرزەکارە بۆ سەرودڵ گرتنی شۆڤێنییەک ئاڕاستە دەکرێت، خۆزگە سەرکردەکانی کورد بە نیوەی حەسەن عەلەوی هەستیان بەو زەرورەتە دەکرد خوای دەکرد هەموو دونیا بە ئەکراد بانگیان دەکردین، هەروەک چۆن ئێستا هەموو دونیا بە هەولێر دەڵێن ئەربیل وهەتا دەسەڵاتیش ناوی فڕۆکەخانەی ئەربیلی نێودەوڵەتی کردە ئەمری واقیع، ئەگەر ئێمە بە خۆمان هەوڵ نەدەین ئەربیل بگۆڕین بە هەولێر، تۆ چاوەروانی حەسەن عەلەوی وعەرەب بەگشتی (الاكراد) لەجیاتی (الكورد) بڵێن؟!
کێشەی مەلا بەختیار زیاتر دەروونییە حەزی خۆدەرخستنی خۆی بۆ کۆنترۆڵ ناکرێت جا با بەهەر شێوەیەک بێت، حەز دەکات هەردەم وەک بیرمەندێک وفەیلەسوفێکی مارکسیزم لە ڕابردوو وسۆشیال دیموکرات لە ئێستا وڕۆشنبیرێکی بلیمەت وحەداسەوی وموتەنەور خۆی دەرخات، کەچی ئەگەر بڕوانینە ژیننامەی مەلا بەختیار لەناو دەسەڵاتی کوردیدا شوێنکاری هیچ یەکێک لەو ئیدیعایانە نابینین، کەچی ئەو برادەرە هێشتا بە عەقڵیەتی ئاڵای شۆڕش دەژیت و وادەزانی هێشتا لەناو کۆمەڵی پێشمەرگەی نیمچە خوێندەوارە ووەک باران زاراوەی مارکسیزم ولینینیزمیان بۆ دەبارێنێتو هەموومانی سەرسام کردوە بە عەبقەریەتی!
مەلا بەختیار وادەزانی کێشەی ئێمە کێشەی زمانەوانییە (الاكراد) و (الكورد)ە ، نازانێت کێشەی ئێمە کێشەی چارەنووس وجودییە، ئەوەی دەسەڵاتی کوردی بە هەردوو ئیمارەتەکەوە بە خەونی کوردیان کرد لەوەتی ١٩٩١ وە کارەساتە بەمانای وشە، لە ژێر سایەی ئەو دەسەڵاتە گەندەڵەدا گیانی ئینتیما بوون خەریکە بەتەواوی لەناو دەچێت لەناو تاکی کوردا... لە ژێر سایەی ئەو دەسەڵاتە خاینبوون وفایلداربوون میدالیای شەرەفە لەسەر سنگی هەر خائینێک، لە سایەی ئەو دەسەڵاتە ئەوەی کاتی خۆی هەزار قوربانی داوە تا خیانەت نەکات لەو رۆژگارە پەشیمان بۆتەوە ودەڵێت چیم بەخۆم کرد ئەگەر خیانەتیشم کردبا دوور نەبوو ئێستا بەرپرسێك بام!! هەرنەبا دڵتەنگ نەدەبووم بە بەرجاوی ئێمە خائینان لە دڵسۆزان نزیکتر کەنەوە!!
لە ژێر سایەی ئەو دەسەڵاتە باشوری سودان بەو هەژاری ودواکەوتویەوە سەربەخۆیی خۆیان وەرگرت، ئێمەش لەو عێراقە نا موبارەکە وا لکاوین پێی وەک ئەو کۆتە تۆپە ئاسنینە لێهاتوە کە ناهێلێت هەنگاوێک بهاوێژین بەرەو ئاسۆ، وەک مەڕ چاوەروانی قەسابەکەمان دەکەین تا جوان جوان چەقۆکەی بۆما تیژ دەکاتەوە وڕۆژانە گوێمان لە کڕینی چەک وتفاقی سوپای عێراقی عەرەبی دەبێت، خەممان نییە بە کەچە دەبابەکانی پاشماوەی سەدام بەگژ نوێترین چەکی ئەمریکی دەبینەوە کە لە دەست حکومەتە دیموکراسیەکەی عێراقە وبەسرودی کەس نەڵێ کورد مردوە بەرەنگاری چەکی ئەتۆمیش دەبینەوە!!
کورە مەلا گیان بەو هەموو تاوانەوە باسی (الاكراد) و (الكورد) م بۆ دەکەیت، بەو هەموو سوکایەتیەوە کە دەسەڵات بە کورد وکوردستانی کردوە دەبێت زۆر مەمنوون بیت پێمان بڵێن (الاكراد).
٧/١/٢٠١٢
 


چاودێرە سیاسیەکان شەکریان خوارد

تا کورد نەڵێت ئەو ڕۆژە خوراین کە گای سپی خورا!!


محةمةد هةريري
hariri66@yahoo.com 

لە ماڵپەڕی ستاندارد کە بە شانازیەوە لە ڕۆژی دامەزراننیەوە تێیدا دەنوسم، هەواڵێک بڵاو کرایەوە لە رۆژی 18/1/2012 بە ناونیشانی (ئه‌وه‌ی‌ لیستی‌ كوردستانی‌ ده‌یكات له‌به‌رژه‌وه‌ندی‌ عه‌ره‌به‌ شۆفێنیه‌كاندایه‌ ) هەواڵەکە بەشێوەیەکی شیکاری دارێژراوە و هۆشداری دەدات کە: "چاودێرانی‌ سیاسیش پێانوایه‌ به‌ نزیك بوونه‌وه‌ی‌ لیستی‌ كوردستانی‌ له‌ لیستی‌ العراقیه‌ زیاتر خزمه‌ت به‌ به‌رژه‌وه‌ندی‌ عه‌ره‌به‌ شۆفینیه‌كان و به‌عسیه‌كان ده‌كرێت، چونكه‌ زۆرینه‌ی‌‌ سه‌ركرده‌كانی‌ لیستی‌ العراقیه‌ پێشووتر په‌یوه‌ندی‌ تووندیان له‌گه‌ڵ ڕژێمی‌ صه‌ددامدا هه‌بووه‌و شۆفینیانه‌ بیر ده‌كه‌نه‌وه‌"
ڕاستیەکەی ڕاستە زۆربەی سەرانی ئەو لیستە بەو شێوەیەن کە باسیان کراوە، بەڵام مرۆڤی سیاسی دەبێت بزانێت هیچ دۆخێک لە سیاسەت جێگیر نییە، ئەوەی هەڵوێستی هەردوو برایانی نوجەیفی بەراورد بکات لەگەڵ هەڵوێستی بەر لە ساڵێکیان هەست بە گۆڕان دەکات، هەمان قسەش دەکرێ بگوترێت دەربارەی ساڵح موتلەگ وعەلاوی وکەسانی تر.
بێدەنگی کورد لە ئاست کارەکانی لە دژی سەرانی سونە و لیستی العراقیە ولەو کاتەدا کە کێرڤی هەستی تاکڕەوانەی مالیکی کە لە ڕۆژنامەوانی خۆرئاوا ئێستا بە صدام ی شیعەکان ناوزەد دەکرێت، گەیشتۆتە چلەپۆپەی، ئەنجامی ترسناکتری دەبێت بۆ کورد.
مالیکی رەفتار دیکتاتۆر [ئەو تێرمە لە رەفتار فاشیەکەی مام جەلال وەرگیراوە] بەرلەوەی لە جەنگی لەناوبردنی پێگەی سەرانی عەرەبی سونە ببێتەوە زۆر دەمێکە جەنگی پەڕاوێز خستنی کوردی گرتۆتە بەر، سەرکردایەتی کوردیش بەوپەڕی سەرشۆڕیەوە قبوڵیانە و ئەگەر لە ترسی بودجە خەیاڵیەکەی بەغدا نەبایە دەبوایە دەمێک با ئەو هاوپەیمانیەتەی هەڵوەشاند بایەوە لەگەڵ ملهوڕێکی هیچ نەدیوی پەڕاگەندەی دوێنێی سوریا کە وەک تاوس پەڕوباڵی گیڤ کردۆتەوە لە عێراق.
سەدان ئەفسەری کورد لە سوپا لادران لە چەندین شوێندا، سەرۆک ئەرکانێکی غەریب وفەقیرمان هەبوو (بابەکر زێباری) کە مێشیش لە دەمی دا دەرناکات کەچی مالیکی سزای دەرنەکردنی مێشیشی دا وزیاتر پەڕاوێزی خست، نازانم کورد هیچ کەسێکی عەسکەری بە کەسایەتی تێدا نییە تا بتوانێت بەپێی یاسا هەموو سەلاحیەتەکانی پیادە بکات یان هەر دەبێت زێباری بێت تا بەکەڵکی ئەو پایەیە بێت؟!!
سەیرە دەسەڵاتی کوردی هەر لەبەردەم دەرکەی ماڵی خۆی ئازایە، ئەگەرنا بۆ هەر لە کوردستان دەردەچن هەمووی هێندە لاواز وسەرکز خۆیان نیشان دەدەن زگت پێیان دەسوتێت.
مالیکی وبەر لەویش جەعفەری کاتێ حوکم دەگرنە دەست بە تامەزرۆیی ١٢٠٠ ساڵ لە مەحرومیەت [بە قەولی خۆیاندا] دەسەڵات وەردەگرن بۆیە هەتا لەڕووی سایکۆلۆزیەوە وزمانی جەستەوەش body language دەگۆڕێن تەماشای ڕۆیشتنی مالیکی وجەعفەری بکەن بەر لە بونە سەرۆک وەزیران ولەپاش بوونیان، وەک کەسانی بوغرای هیچ نەدیو هەموو سوڕخواردنیان بەدەوری خودی ئاوساویانە، سەیر لەوەیە ئێستا کورد باسی ئەگەری جەعفەری کردنەوە بە سەرۆک وەزیران دەکەن وەک بلێی نەیان ناسیبێت.
چیرۆکی مالیکی وسونە وکورد وەک چیرۆکی ئەو پەندە بەناوبانگەیە کە دەڵێت (اکلت یوم اکل الثور الابیض) کە دەڵێن شێرێک لە نزیکی سێ گای سور وڕەش وسپی دەژیا کە لەبەرئەوەی یەک دەست بوون لێیان دەترسا هێرشیان بکاتە سەر، ڕٶژێکیان بیرۆکەیەکی دۆزەخی بۆ هات و چووە لای گای سور و ڕەش وپێیانی گوت: بوونی گای سپی لەناومان چاک نییە بۆ ئێمە چونکە رەنگی جوانە هەموو ئاژەلەکان خۆشیان دەوێت وهەروەها لەوانەیە تیرۆریستیش بێت، ڤیدیۆی ئیعترافی هەموو مەیمونەکانیشمان لایە وپاش تڕۆکردنی یان خواردنی نیشانی هەموو خەڵکی جەنگەڵستانەکەی دەدەین، گای سور و ڕەش پاش کەمێک وەستان ڕازیبوون شێرەکە بیخوا هەرنەبێ مونافسێك لە ئالیك خواردن کەم دەبێتەوە وکێ دەزانێ لەوانەشە شێر ڕاست بکات تیرۆریستیش بێت. گای سپی خورا وهێندە هاواری گای سور و ڕەشی کرد کەس وەڵامی نەدایەوە.
هێندەی نەبرد شێر برسیەتی وحەزی کەبابی جوڵا وبۆنەیەکی ئایینی گەورەی شێرانیش لە ڕێگادا بوو پێویستی بە قوربانی کردن بوو، شێر بە جورئەتتر چوە لای گای سور وپێی گووت: دەزانی گای ڕەش دیمەنی دزێو و ترسناکە هەموو ئاژەڵەکانی تر سەبارەت بە ئەو ڕقیان لە ئێمەش دەبێتەوە، هەروەها باپیرە گەورەی دەستی هەیە لە شەهید کردنی (شێرە مەزنەی) باپیرە گەورەمان ڕوحم بە قوربانی بێت کە چەند ڕۆژێکی تر یادی شەهید بوونی دەکەینەوە، چەندین شێر بەپێ لە جەنگەلەکانەوە دێن بۆ ئەو یادە، ڕات چییە بیخۆم؟! گای سور بە بێ بیر کردنەوە گووتی: بیخۆ وخەلاسمان کە!!!
پاش ماوەیەک چوە لای گای سور وگووتی هەرچەندە پێویستم بە هێنانەوەی ئەسباب نییە بۆ خواردنت، بەڵام تا نەڵێن پیاوێکی دیموکراسی نییە پێویستە تاوانەکانت بۆ بخەمە ڕوو، تۆ تا بڵێی ئینفیساڵی وبەتەمای پارچە پارچە کردنی ئەو جەنگەڵەی کە هەزاران ساڵە هەموومان وەک برا تێیدا دەژین بە یەکەوە! جگە لەوە لە پشتەوە وبەنهێنی ئاوی جەنگەلەکەمان دەفرۆشیتەوە بە کۆمپانیای نەرویژی وئەمریکی کە ئەوەش کاری سەرۆکی جەنگەڵە کە منم [خوا بمپارێزێت]
گای سور گووتی: پێویست بە خوێندنەوەی ئەسبابی تر ناکات چونکە منیش لە تۆ چاکتر نیم بەڵکو لە تۆش هیچ وپوچترم، بەڵام ئەو ڕۆژە خورام کە گای سپیت خوارد.
١٩/١/٢٠١٢

ئەردوگان و کەوتن لە دەرسی کوردی




محةمةد هةريري
hariri66@yahoo.com 






ناسینی من بۆ ئەردۆگان دەگەرێتەوە بۆ بەر لە بوونە سەرۆک وەزیران، لە ١٩٩٥ کە لە ئەستەمبۆل بووم، نزیکەی هەشت مانگێک لەوێ بووم، لەو ماوەیە خەڵکێکی زۆرم ناسی لە تورک وکوردی تورکیا، لەو ڕۆژانە ئەستێرەی ئەردوگان تازە دەرکەوتبوو بەڵام دەرکەوتنێکی زۆر بە هێز، ئەو کاتە ئەردۆگان نزیکەی دوو ساڵ بوو سەرۆک شارەوانی ئەستەمبۆل بو، بەڵام چۆن سەرۆک شارەوانیەک گەورە و بچوک ستایشی کارەکانی دەکرد، من هەر ئەو رۆژانە هەستم بە دواڕۆژی پڕشنگداری ئەو پیاوە دەکرد، هەستم دەکرد لە ئەربەکانی مامۆستای سیاسیترە، هێندەی نەبرد لە ساڵی ١٩٩٨ ئەردۆگان لە ئەربەکان جیابوەوە لەگەڵ گروپێک لە هەڵبژاردەی ناو حزبەکە بۆیە ئەربەکان تا مردیش ئەو زامە نێرگزیەی لەبیر نەچوو یان ئەو پێشکەوتنەوەی قوتابیەکەی بۆ هەرس نەکرا تا ئەو ڕادەیەی بەر لە کۆچی دوای بە ماوەیەکی کەم گوتی: "ئەردۆگان و عبدوڵڵا گول ئامرازی دەستی زایۆنیزمن" و "تەڵەی دوژمن مناڵەکانمان لێ دەڕفێنێ، تۆرگۆت ئۆزال لە سەرەتا لێمان جیابوەوە، ئینجا ئەردۆگان لێمان جیابوەوە، بەڵام کاتی ئەوە هاتوە هەموو کەس جیاوازی نێوان ڕەسەن و لاسایی کەر بزانن، جیاوازی زۆرە لە نێوان ڕەسەن وجیاوازی کەر." لەوەش زیاتر گوتی: " زایۆنیزم زۆربەی میدیای وڵاتەکەی قۆرخ کردوە وهەر هەموویان لە خزمەتی ئەردۆگان دان، ٣٠ رۆژنامە و ٣٠ کەناڵی ئاسمانی شەو و ڕۆژ لەڕاژەی ئەودان...." قسەی تریش بەڵام پێویست بە زیاتر ناکات.
جا ئەو لێدوانانە لە هەر هۆیەکەوە سەریان هەڵدا بێت گرنگ نییە، گرنگ ئەوەیە ئەردۆگان بەردەوام بوو لە سەرکەوتن و توانی بەسەر زۆر تەحەدای گەورە زاڵ بێت، ئەگەر بزانین ژیان هەمووی دەرس و وانەیە بۆ سەرکەوتن لە تاقیکردنەوەی دنیادا بەلای کەمەوە لای ئەردۆگان وایە وەک کەسێکی دیندار لەسەر ئاستی تاکە کەسیدا و تا رادەیەکیش سیاسیدا، ئەوە گومانی تێدا نییە کە ئەردۆگان لە زۆربەی هەرە زۆری وانەکانی سەرکەوتوو بوە بەڵام بە ئیمتیاز لە دەرسی کوردی ساقیت وکەوتوو بوە.
لە دەرسی سیاسی دەست پێبکەین هێشتا لە حوکمی قەدەغەکردنی لە سیاسەت دەرنەچو بوو کاتێک زۆربەی کورسیەکانی پەرلەمانی بردەوە لە ٢٠٠٢، ئەو سەرکەوتنانە تا ئەمڕۆش بەردەوامە، وتەنها حزبێکە بۆ ئەو ماوەیە درێژە بە تەنها بەبێ تەحالف حوکم دەکات.
لە دەرسی عەسکەری دا، ئەوەی ئەو پیاوە کردی بە دامەزراوەی عەسکەری نە بە خەیاڵی کەس دا دەهات نە بە کەس دەکرا، توانی زۆر زیرەکانە پەڕ وباڵی ئەو نوخبە عەسکەرییە بکات کە لە سەردەمی ئەتاتورکەوە لەسەر سنگی گەلانی تورکیا دانیشتوون.
لە دەرسی دەستوریش تا رادەیەکی زۆر توانی هەموو خاڵە نێگەتیڤەکانی دەستوور لا بدات، هەرچەندە کوردەکانی تورکیا بە شێوەیەکی گشتی لێی ڕازی نەبوون.
لە دەرسی یۆنانی سەرکەوت لەگەڵ ئەو دوژمنایەتیە مێژووییەی نێوانیشیان، توانی پەیوەندیەکی چاک دروست کاتەوە.
لە دەرسی ئەرمەنی تا ڕادەیەکی زۆر سەرکەوتوو بوو، چەندین دەرگای داخراوی لەسەر کۆماری ئەرمنستان کردەوە.
لە دەرسی ئابووری لە سەردەمی سەرۆک شارەوانییەوە تا ئەمڕۆش سەرکەوتن بە دوای سەرکەوتن تۆمار دەکات.
لە دەرسی پەیوەندییە ئیسلامیەکانی توانی گەورەترین کاریزما بۆ خۆی مسۆگەر بکات، تا ئەو ڕادەیەی بۆتە خۆشەویسترین سەرکردەی جیهانی ئیسلامی، هەرچەندە من سەرنجێکی زۆرم هەیە لەو بارەوە لە وتارەکانی ترم لەسەر ئەردۆگان زۆر جار گوزارشم لێکردوە بە پێویستی نازانم دوبارەیان بکەمەوە.
لە دەرسی ئیسرائیل زۆر سەرکەوتوو بوە تا ئەو ڕادەیەی زۆربەی سەرکردە عەرەبەکانی خستۆتە قەیرانی بێ هەڵوێستی.
 لە وەڵامی ئەوانەی کە هەنگاوە سستەکانی ئەردۆگان دەگەرێننەوە بۆ ترسی ئەردۆگان لە سوپا یان بنکە جەماوەریەکەی دەڵێین، ئەگەر ئەو پیاوە توانای شکاندنی ئەو هەموو موحەرەماتە تەقلیدیانەی سیاسەتی تورکی هەبێت، بۆچی کە دێتە سەر دۆزی کورد وا چەق دەبەستێت؟! لە ڕاستیدا ئەردۆگان ویستی چارەسەرکردنی لا نییە، تەنها جاروبار لێدوانێکی لەناکاو دەدات لە گەرمەی گەمەی هەڵبژاردن وخەڵکێکی زۆریشی پێ هەڵدەخەڵەتێنێ، ئەو قەیرانەی ئەم دوایەش سەلماندی کە ئەردۆگان هێندەی سەرکەوتوە لە دەرسەکانی تری ناوەوەو دەرەوە، هێندەش ساقیتە لە دەرسی کوردی.
٢٧/١٠/٢٠١١
لەندەن

شۆڕشە مەزنەکان وگەڕانەوەى خەباتى گەلان بۆ باوەشى مەدەنیەت




شۆڕشە مەزنەکان وگەڕانەوەى خەباتى گەلان بۆ باوەشى مەدەنیەت

محەمەد هەریری
hariri66@yahoo.com 

ئەو شۆڕشە مەزنانەى ناوچەکە ولە شۆڕشى مەزنى تونسەوە بۆ شۆڕشى مەزنى میسرەوە بۆ یەمەن و لیبیا و سوریا تا کوردستان گەورەترین خاڵی پۆزەتیڤى ئەو شۆڕشانە ئەوەیە کە توانیان هەستى متمانە بەخۆبوون بۆ جەماوەرى گشتى وپان وبەرینى سەر شەقامەکان بگەڕێنەوە وخەباتى ڕزگار بوون لە دیکتاتۆریەت وڕژێمە گشتگیر وشمولیەکان بگەڕێننەوە لەلاى چەند گروپ ورێکخراوێکى توندوتیژ ومافیا ڕێچکە  بۆ باوەشى گەرم وگرنگى مەدەنیەت. گەڕانەوەى خەبات بۆ ئامێزى مەدەنیەت هەموو جیهانى یەکەم ودووەم وسێیەمیشى سەرسام کردوە ئەو قسانەى پیاوە ناودارەکانى جیهان لەسەر شۆڕشەکانى میسر وتونس ویەمەن دەیکەن جێگاى شانازیە بۆ هەموو جیهانى ئیسلام وداهێنانێکە لە دنیاى سیاسەت ونایابکاریەکە لە شۆڕشکردندا.
گەڕاندنەوەى خەبات بۆ ئامێزى مەدەنیەت ماناى چییە؟! ماناى ئەوەیە هیچی تر کەسایەتە توندڕەوە سیاسی وئایینیەکان لە کون وقوژبنەکانى ئەو جیهانەى کە پێی دەڵێن جیهانى ئیسلامى لە کاسێتە دزەپێکراوەکان دەرناچن بەخۆیان وبە کلاشینکۆفێکى ژەنگاوى بە دیوار هەڵپەسێنراو وقسەى قۆڕ وتوڕەهات بکەن بەناوى جەماوەرى جیهانى ئیسلام وزیاتر وزیاتر سومعەى موسڵمانان وئیسلامیش بەرن، تا ڕادەیەک ئەو لەقتەیەى بن لادن و زەواهیری لەسەرتاسەرى جیهانى ئیسلامدا لەلایەن کەمینیەکى توندڕەو لاسایی دەکرایەوە، یان کاتێک ئەبو موسعەبى زەرقاوى گۆڕ بەگۆڕ وەک دڕەندیەکى گۆشت خۆر بەکێردەوە پەلامارى رۆژنامەوانێکى ئەمریکى بەسەزمانى دا کە ناسراو بوو بە دژایەتیکردنى سیاسەتى ئەمریکا ودژى داگیرکردنى عێراقیش بوو، وەک ئاژەڵ سەری بڕى، ئەو ئینتەرنێتە پڕاوپڕ کرا لەو کارە بآ ڕەوشت ونائەخلاقیە وسەدان توندڕەو بەهەمان لەقتەو ودیارگەدا ڕادەوەستا وچەند ئایەتێکى قورئانیان دەخوێندەوە (رب تال للقرآن والقرآن یلعنه) بەهەمان شێوە دڕندانەکەى زەرقاوى لەگەڵ کۆتایی قسەکانى پڕى دەدایە قوربانیەکەى وسەرى دەبڕى ئێستاش بڕینى سەرى چەند لاوێکى کوردى ناوچەى بادینانم لەبیر ناچێت کەلەسەر ڕێگاى بەغداد گوایە ئۆتۆمبیلیان تێک چوو بوو وپەنایان بۆ شورتەى عێراقی بردبوو کەچى هەر ئەو شورتانە پەیوەندیان بە توندڕەوەکانى قاعیدە کردبوو وپێیان فرۆشتبوونەوە لەوانەیە سەرى 100 دۆلاریشیان پێنەدرا بێت!!
بەو شۆڕشە مەزنانە بۆ جیهان دەرکەوت کە ئێمەى جەماوەرى گشتى جیهانی ئیسلامى ئەگەر بێدەنگیش بووین لەو فەزاعەتانەى کە دەکرا بەناوى ئێمەوە بەڵام ماناى ئەوە نییە کەلێی ڕازیبووین، ئەوەتە خەڵکى شۆڕشگێڕی سەرتاسەرى وڵاتانى عەرەبی وکوردستانیش خەباتى ئاشتیانە هەڵدەبژێرن ولە زۆربەى خۆپیشاندانەکان دروشمى (سلمیە) واتە ئاشتیانە دەبیستین، ودوا شتى جوان کە دیتم لە یەکێک لە خۆپیشاندانەکانى شارەکانى سوریا ئایەتێکى قورئانیان بەرزکردبوەوە کە بەجوانترین شێوە گوزارشى لەو ئاشتیخوازییە دەکرد: (لئن بسگت یدک الی لتقتلنی ما انا بباسگ یدی الیک لڕقتلک) واتە ( ئەگەر تۆش دەستم لێوەشینى بۆ ئەوەى بمکوژیت من دەستم بۆ کوشتنت هەڵنابڕم) ئەو وتە گرنگ وجوانە لەکوآ کوشتنى خەڵکى هەژار وبرسی لە کوآ بەناوى ئەوەى شیعەن یان یەزیدین یان مەسیحین یان لەگەڵ حوکمەتن وهەتا دوایی ئەو توڕەهاتانە. ئەو خەباتە جوان وبێگەردەى شۆڕشە نوێیەکان لە کوآ وخۆتەقاندنەوە لە تازیە وسەرقەبران و چێشتخانەى شەعبی لە کوآ! ئەو ترسنۆکیەى توندڕەوان لەکوآ وئەو ئازایەتیەى شۆڕشگێڕان لە کوآ وەک بۆ نمونە ئەو گەنجانەى شارى بانیاسی سوریا چۆن بە سنگى ڕووت لەبەردەم تانکە بآ ڕەحمەکانى بەشار وبەعس لەسەر ڕێگا ڕاشکان!! ئەو گەنجە بوێرانەى کفنی سپیان پۆشیبوو  لە سوریا کەچى بە ئاشتیانە خۆپیشاندانیان دەکرد لەکوآ وئەو ترسنۆکیە قێزەونەى گروپێکى سەلەفی سەر بەقاعیدە لە فەلەستین لە کوآ کە چالاکوانێکى گەنجى ئیتالیان فڕاند بەناوى  فیتوریو ئەریغۆنى کە ئەندام بوو لە بزاڤى هاوکارى نێودەوڵەتى لەگەڵ گەلى فەلەستین، کە بەوپەڕى دڕاندانە کوشتیان تەنها لە پێناو فشار خستنە سەر دەسەڵاتى حەماس بۆ بەردانى ڕابەرى گروپەکەیان ئەبو وەلید ئەلمەقدەسی لە زینداندا.!!! بینە بەرچاوى خۆت کەسێک لە یەکێک لە خۆشترین وڵاتەکانى ئەوروپا (ئیتاڵیا) بێتە فەلەستین بۆ بەرگرى لەگەلى فەلەستین ودۆزە ڕەواکەى کەچى تۆ بیفڕێنى وبیکوژیت لە پێناو بابەتێک لە دوور ونزیک پەیوەندى بەو گەنجە رۆژنامەنوسە نەبوو!! بەڕاستى ئەوەیە نامەردى وترسنۆکى لە دیارترین شێوەیدا، پێغەمبەر (د.خ) هەتا مونافیقەکانى نەدەکوشت چونکە لە ڕواڵەتدا سەر بە ئەو بوون ودەشیى ناسین کە یەکێک پێی دەگووت با بیان کوژین دەیگوت: (نامەوێت بڵێن محمد هاوەڵانى دەکوژێت!!) چونکە ئەگەرچى مونافیق بوون بەڵام لەبەرچاوى خەڵک لایەنگیری پێغەمبەر بوون! ترسنۆکى ئەو ژنانەى کە لە ئوردن لەناو زەماوەندێک خۆیان تەقاندەوە لە کوآ و ئازایەتى ئەو ژنانەى گوندى بەیزا لە کوآ کە بەوپەڕی بوێرانە بەبآ پیاو کەوتنە سەر شەقامەکان لەدژى گرتنى کوڕ وباوک وبراکانیان.؟! بەڕاستى ئەوەى ڕودەدات هەر گۆڕانکارى لە سیاسەت ناکات بەڵکو گۆڕانکاریەکى گەورە لە سایکۆلۆژیەتى جەماوەر دەکات ولە نێگەتیڤى بەرەو کرانەوەیەکى پۆزەتیڤیان دەبات ولە کارلێکراو دەیان گوێزێتەوە بۆ بکەر، لە هەمووى گرنگتر ئەو شۆڕشە جەماوەرى ڕزگار کرد لە زیندانى گروپە تیرۆریستەکان وکردەوە قێزەونەکانیان وئەو خەباتە پیرۆزەى گەلانى گەڕاندەوە ئامێزى مەدەنیەت.

پیرۆسترۆیکای سەلەفییەت

پەڕینەوە لە قسەی کتێب ونامیلکە 


وکاسێت بەرەو واقیع

محەمەد هەریری
ئەوەی لەو ڕۆژگارە لە نێو سەلەفیەتدا ڕوودەدات زۆر لە پیرۆسترۆیکاPerestroika ی کۆمۆنیزمی سەردەمی گۆرباتشۆف لە هەشتاکاندا دەچێت، کاتێ گەورەترین کرانەوە وبنیاتنانەوەی ئەنجامدا لەناو فیکر وسیاسەتی کۆمۆنیزم ودەوڵەتی سۆڤیەت کە بەجۆرێک لە جۆرەکان بەرجەستەی کۆمۆنیزم بوو. دەبێت چی بێت وا سەلەفیەتی پەشۆکاو کردبێت وا بەپەلەپروزکێ کە تا دوێنێ هەموو ئەو بیروڕایانەی بە کوفر وبیدعە وهەرتەقەیان دەزانی ئەمڕۆ مەشروعیەتی پێ بدەن؟!
دەکرێ هۆی ئەو پاشەکشێیە لە هەڵوێستە [عەقایدیەکان] یان بگەڕێتەوە بۆ هێزی پرنسیپەکانی دیموکراتیەت، یان هێزی کورسیبازی یان هێزی واقیع؟! ئێمە لێرەدا زەنی چاکیان پێدەبەین و دەڵێین ئەگەرچی دەکرێت هەموو ئەو هۆکارانە هۆی ئەو پاشەکشێیانە بن بە ڕێژەی جیاواز بەڵام چەپۆکی واقیع وپەڕینەوە بۆ دونیای واقیع دوور لە قسە توندوتیژەکانی مینبەری سەلەفیەت و دوور لە قسە نامەسولەکانی کاسێتی بانگخوازە سەلەفیەکان و دوور لە نامیلکە بەرگ لوسەکانی سعودیە وخەلیج ودوور لە قسەی ناو ئەلقە داخراوەکان، گەورەترین هۆکاری ئەو پاشەکشێیە وبەخۆدا چوونەوەن.
ئەو سەلەفیەتیەی کە زەمەنی وەستاندبوو لە وێستگەی سێ نەوەکەی سەلەفی ساڵح لە پاش کۆچی دوایی پێغەمبەر [درودی خوای لەسەر بێت] فەرزی کردبوو لەسەر هەموو موسڵمانان وەزیفەی بیرکردنەوە ئیلغا بکەن لە ئاست هەر کاروبارێک سەلەفی ساڵح چارەسەریان بۆی هەبێت، هەر لەو ڕوانگەیەوەش ڕوبەری حەرامەکانیان هێندە بەرفراوان کرد بوو وەک روبەری ئاویان لێکرد بوو بە نسبەت وشکایی زەوی، لە ناکاو لە پاش شۆڕشەکانی بەهاری وڵاتانی عەرەبیدا کە ئاواتە خوازین چەپکێ لە نێرگزی ئەو بەهارە بەبەر هەموو پارچەکانی کوردستانیش بکەوێ، زۆربەی چەمکەکانیان گۆڕی وچونکە گۆڕانکاریەکان زۆر خێران خەریکە هاوسەنگی خۆیان لەدەست دەدەن لە فراوانکردنی ڕوبەری ڕێگەپێدراوەکان [موباحەکان] وەک ئەو لێدوانەی  وتەبێژی حزبی نوری سەلەفی کاتێ گوتی: ئێمە ڕیز لە ڕێکەوتنەکانی کامپ دەیڤێد لە گەڵ ئیسرائیل دەگرین!! کە ئەو قسانە نەک بە پێوەری ئیسلامی سەلەفی بەڵکو بە پێوەری نەتەوەییە عەرەبەکانیش کوفرە.
هەر ئەو سەلەفیانە لەسەر زمانی قوتبێکی هەرە گەورەی سەلەفیەت لەسەردەمی پێش شۆڕش وقسەی موحازەرات وپاش تێری بەر سێبەری داوای بە کۆیلە کردنی خەلکی غەیرە موسڵمانی دەکرد بۆ چارەسەری کێشەی هەژاری بە جیهاد کردن، وەک لە وتارێکی سەربەخۆ باسمان لێوە کرد، کاتێ ابو اسحاق الحوینى دەڵێت:
"هو الفقر اللی إحنا فیه ده مش بسبب ترکنا للجهاد؟، مش لو کنا کل سنە عمالین نغزو مرە ولا اتنین ولا تلاتە مش کان هیسلم ناس کتیر فی الارض”، کل واحد کان هیرجع من الغزوە جایب معاه “یقصد الاسرى” تلات اربع اشحطە وتلات اربع “نسوان” وتلات اربع ولاد، اضرب کل رأس فى ستمیت درهم ولا ستمیت دینار یطلع بمالیە کویسە”

(مەگەر ئەو هەژارییەى ئێمە تێیدان بەهۆی وازهێنانمان لە جیهادکردن نییە؟ ئەگەر ئێمە ساڵانە جارێک ودوو یان سێ جار غەزامان کردبا خەڵکێکى زۆر موسڵمان دەبوون لەسەر زەوى، وهەرکەسەى دەگەڕایەوە لەو غەزایە بە سێ چوار پیاو (ئەو وشەى اشحطەی بەکار هێناوە کە سوکایەتى پێکردنە بە ئادەمیەتى مرۆڤى ناموسڵمان وەک علوجى کۆنى توراسمان) و سێ چوار ژن و سێ چوار منداڵ، هەر سەرێکى بدە لە شەش سەد درهەم یان دینار پارەیەکى چاکت لێی دەست دەکەوێت!!!)
ئەوە چارەسەری سەردەمی قسەی نەزەری وناواقیعی بوو کەچی ئێستا ناوێرن باسی ئیسرائیلیش بە خراپە بکەن لەبەر ئەمری واقیع.

سەلەفیەکان هەر کتێبێکیان بکەیتەوە باسی کوفری سیستمی دیموکراتیەت دەکات هەتا ئەو ڕادەیەی لە بەرنامەیەکی تەلەفزیۆنی کەسایەتیەکی سەلەفی بەژداربووی یەکەم هەڵبژاردنی دیموکراسی میسر داوەت کرابوو وەک فەیلەسوفێکی دیموکراتیەت باسی لە بەها دیموکراسیەتیەکان دەکرد، بەڵام توشی پەشۆکان هات کاتێ گرتەیەکی ڤیدیۆیی ئەو برادەرەیان لێدا لە سەردەمی قسەی مینبەر وتیۆریدا دەڵێت دیموکراسیەت کوفرە!!
هەر سەرۆکی حزبی نور عماد عبد الغفور لە دوا چاوپێکەوتنەکانی ڕەتی دەکاتەوە کە ئازادییە گشتیەکان وەک ئازادی دەربڕین وجل پۆشین بخرێتە ژێر حوکمی بنەماکانی شەریعەت دەڵێت:" ئەو شتانە بە زۆرەملێ نین"
هەڵوێستی سەلەفیەتی هاوچەرخ لە دیموکراسیەتدا هاتا لە سەلەفیە کۆنەکانیش خراپترە، ئەوەتە لە سەردەمی زانایەکی سەلەفی بەناوبانگی وەک محمد رشید ڕەزا، خەڵکی هێندە سەرسام بوون بە دیموکراسیەت وبنەماکانی تا ئەو ڕادەیەی دەیانگوت دیموکراسیەت لە ئسوڵی ئایینی خۆمانە بۆیە ئەو زانایە لەرۆژنامە بەناوبانگەکەی وەڵامیان دەداتەوە، بەڵام چۆن وەڵامێك وەک زانا سەلەفیەکانی ئەو سەردەمە ناڵێت دیموکراسیەت مانای حاکمیەتی جەماوەر دەگەیەنێت کە ئەویش شیرک و هاوبەشی بڕیاردانە بۆ خوا، بەڵکو دەڵێت:" ئەی موسڵمان مەڵێ ئەو حوکمە [دیموکراسیەت] ئەسڵێکە لە ئسوڵی ئایینی خۆمان، ولە قورئان و ژیننامەی خەلیفە ڕاشدیەکان پێمان زانیوە نەک لە بەرخورد کردن لەگەڵ ئەوروپیەکان، دیتنی ئەحواڵی رۆژهەڵاتیەکان. چونکە ئەگەر ئەحواڵی ئەو خەڵکەتان واتە [ئەوروپیەکان] پەندیار ونموونە نەبوبێت وکاری لێنەکردبان نە تۆ ونە هاوشێوەی تۆ بیرتان نەدەکردەوە کە ئەوە [واتە دیموکراسیەت وبنەماکانی] لە ئیسلامدایە."
 دەربارەی ئافرەت کە توندوتیژی سەلەفییەت وسەلەفیەکان بەدیارترین شێوە وتوندترین شێوە دژی ئەو ڕەگەزە دەردەکەوێت چونکە ئافرەت لە نیوان دوژمنە بی شومارەکانی بە لاوازترین ئەلقە دادەنێت، کاتێ فەرمانڕەوا سەرکوتی دەکات وکۆمەڵگا پشتی لێدەکات هەموو چەقی توندوتیژی ئاڕاستەی ئەو [زەعیفانە] دەکات و لەواندا تەعویزی خاڵیکردنەوەی توندوتیژیەکانی دەکاتەوە، بۆیە وەک لە کوێت وسعودیە ومیسر سەرانی سەلەفیەت نەک دژی خۆکاندیدکردنی ئافرەت بوون بەڵکو دژی دەنگدانیشی بوون، لە سعودیە دژی لێخوڕینی سەیارە وسەفەرکردنیشین بەبی میرد ومەحرەم با دایکی دە منداڵیش بێت!! ئەو هەموو کارانەش بە بیانووی حەدیسێکی وەک "لن يفلح قوم ولّوا أمرهم امرأة" ئەنجامی دەدەن کە ئامادە نین گوێ بۆ هیچ تەفسیرێکی تری جگە لە خۆیان بگرن وەک تفسیری شێخە ڕوناکبیرەکانی تری وەک محمد الغزالي، بەڵکو لە هەر موناسەبەیەک باسی مافێکی ئافرەتان کرا ئەو حەدیسە دەڵێن ودەڵێنەوە، کەچی لەبەر هێزی واقیع ولەبەر خاتری مەجلیسی عەسکەری ئافرەتیشیان تەرشیح کرد بەشێوەیەکی زۆر کاریکاتێریانە کە لەجیاتی وێنەی کاندیدە ژنەکان بەوەکالەت یان وێنەی گوڵێکیان لەجێی دانا بوو یان وێنەی مێردەکانیان!! کە هێندەی نەبرد ئەویشیان ڕاست کردەوە بە بڵاوکردنەوەی وێنەی ژنە مونەقەبەکانیشیان!!
ئەوە لە کاتێکدا نەک وێنەی ئافرەتان بەڵکو وێنەی پیاوانیش حەرامە لە فیقهی سەلەفییەت، کەچی ئێستا خەریکە ژمارەی کەناڵە فەزاییەکانی سەلەفییەت زۆرتر دەبێت لە خەڵکانی تر.
لە سەرەتادا گوتمان ئەوەی ڕودەدات پیرۆسترۆیکای سەلەفییەتە، بەڵام مەرج نییە پیرۆسترۆیکا بتوانێ چارەسەری داخراوی وئینغیلاقیەتی فیکری سەلەفییەتی پێ بکرێت، چونکە چۆن پیرۆسترۆیکای غۆرباتشۆف هەرەسی هینا بە خودی کۆمۆنیزم وزەبرێکی وەشاندێ کە تا ئەمڕۆ نەیتوانیوە پشتی لێ ڕاست کاتەوە، لەوانەیە سەلەفییەتیش کە لە زۆر ئەدگارەکانی هاوشێوەی کۆمۆنیزمە لە بواری مۆنۆپۆڵکردنی هەقیقەت وسوکایەتکردن بە نەیارانی وحەتمیەتی تاریخی وگەلێک بواری تر، لەگەڵ ئەو پیرۆسترۆیکایە پشتی بە عەرز کەوێت چونکە چاکترین پێچواندن بۆ کۆمۆنیزم و سەلەفییەت ئەوەیە کە ئەو دوانە دوو تێڵای چەماوەن شکانیان لە ڕاستکردنەوەیاندایە.
ئەو قسانە ڕاستە ئاڕاستەی سەلەفییەکان دەکرێن بەڵام مانای ئەوە نییە زۆر گەشبینیش بین بە سەرکەوتنی ئیخوان لە تاقیکردنەوەی دیموکراسیەت بە هەموو میراتە فیکری ومێژووییە نا دیموکراتیەکەی کە سەنگی تەرازووی بەرەو سێنتڕاڵیزم و تۆتالیتاریەت زیاتر لارە تا ئازادییە گشتیەکان.
١/١/٢٠١٢

بەهار وزستانی کەس نییە:
بەهاری ئازادیخوازان وزستانی دژە ئازادییە

محەمەد هەریری


لە پاش ئەو گۆڕانکارییە گەورانەی لە وڵاتانی عەرەبی ڕویاندا کە سەرقافڵەی دیکتاتۆریەت بوون لە جیهاندا، میدیای جیهانی چەندین ناو ونازناوی بەخشییە ئەو شۆڕش وڕاپەڕینانە لەنێویانیشدا بەهاری عەرەبی بوو، ئەو زنجیرە شۆڕشە بێوێنانەی کە لەماوەی ساڵێک توانی چەندین دەسەڵاتی دیکتاتۆری ڕاماڵێت وەک موبارەک وزەینولعابدین بین عەلی وقەزافی وهەروەها عەلی عبد الله ساڵح وبەشار ئەسەد وکەسانی تریش بەڕێوەیە...
ئەوانەی بەو شۆڕشانە هەڵسان هەمووی لاوی خوێن گەرم وبیرواڵا بوون لەبەر پاکی وبێ تەماعی نەهاتن وەک شۆڕشەکانی پێشوو [مجلس قیادة الثورة] دامەزرێنن، بەڵکو شۆڕەشەکەیان کردە مولکی خەڵک، تا ئەو ڕادەیەی لاوێکی وەک وائیل غونیم کە بە هەڵگیرسێنەری سەرەکی شۆڕشی ٢٥ یەنایەری میسری دادەنرێت، کاتێ شێخ قەرەزاوی هاتە مەیدانی تەحریر چوە سەر سەکۆکە بۆدی گاردەکانی قەرەزاوی نەیان هێشت هەتا بێتە سەر سەکۆیەکە وەک بڵێی شێخ قەرەزاوی هەڵگیرسێنەری بێت، کە نکولی لە ڕۆڵی قەرەزاوی ناکرێت و ڕۆڵێکی زۆر گرنگی هەبوو لە هاندانی خەڵك – بەڵام ئەو ڕٶڵە هەرگیز نەدەگەیشتە ئاستی رۆڵی وائیل غونیم وهاوڕێکانی تر لە قورئانیش دەڵێت: (السابقون السابقون، أولئك المقربون) !!
ئەو گەنجانەی هاتنە ئەو مەیدانانە تەنها لە پێناو نەهێشتنی جەور وستەم و دیکتاتۆریەت و گەڕاندنەوەی کەرامەتی مرۆڤانەی خۆیان وخەڵك هاتن، نە بە مەبەستی هەڵگیرساندنی شۆڕشی ئیسلامی بوون نە شۆڕشی عەلمانی، ئەو تۆیەی چاندیان لەو مەیدانانە نە بۆ نەخشاندنی بەهاری ئیسلامیەکان بوو ونەبۆ هێنانی زستانی عەلمانیەکان بوو، ئەوانەشی ئەو جۆرە تەحلیلانە دەکەن لەڕاستیدا زۆر ڕواڵەتیانە بۆ بابەتەکان چوون...ئەگەر ئەو گەنجانە ئەو کارەیان کردبا هەرگیز نەدەبوو ئەو بەهارە بدەن بە دەمی ئیخوان کە هەتا ٢٣ یەنایەریش واتە ٢ رۆژ پێش ٢٥ یەنایەر خۆیان ساغ نەکردبوەوە ئامادە نەبوون ئیمزا بکەن لەسەر بەیانی لادانی موبارەک وەك نوسەری بوێری حەرەکەی کیفایە عبدالحلیم قندیل باس دەکات ودەڵێت: محمد البلتاجی سەرکردەیەکی ئیخوان پاش خوێندنەیەی بەیانەکە گووتی:"ئیخوان هەرگیز ڕازی نابن بەژداری بکەن لە ئیمزاکردنی بەیاننامەیەک ناوی موبارەک ولادانی تێدا بێت، ئێمە تەنها دەمانەوێت هەردوو ئەنجومەنی شورا وشەعب هەڵبوەشێنەوە!!" [القدس ٢٠/١١/٢٠١١]
ئەگەر ئەو بەهارە بدرایە کەسێک هەرگیز نەدەدرایە حزبی نور ی سەلەفی [ کە بەراورد ناکرێن لەگەڵ ئیخوان لە ئاستی میانرەوی خیتابی فیکری ومومارەسەدا] کە زۆربەی کاندیدەکانیان وێنەیان بڵاوناکەنەوە گوایە وێنە حەرامە، وکاندیدە ژنەکانیش بەوەکالەت یان وێنەی گوڵێکیان لەجێی داناوە یان وێنەی مێردەکانیان!! ئەوەی بەو عەقڵیەتە جڵەوی دەسەڵات بگرێت هەزار بەهاری وا لە خەڵک دەکاتە زستانی زەمهەریر.
ئەو بەهارە ئەگەر بدرایە کەسێك دەبا بدرایە ئەوانەی بەوپەڕی بوێری بەرەنگاری ئەو ڕژێمە دەبوونەوە وەک حەرەکەی کیفایە کە بە چەند سەد کەسێکەوە ڕوبەڕوی ئەمنی مەرکەزی دڕەندە دەبوونەوە یان لە جیاتی حزبی [نور] دەبوایە بدرایە ئەیمەن [نور] کە بەرامبەر موبارەک خۆی کاندید کرد بەوپەری تەحەداوە، کە دەردێکیان پێکرد خستیانە زیندان وچەندین نەخۆشی تووش هات وچەندین تۆمەتیان بۆ هەڵبەست هەتا گەیشتە ئاستی ڕەوشتی وکەسێتی یان بەرادیعی کە لە گەرمەی شۆڕشدا گەڕایەوە میسر هەر لە فڕۆکەخانەی قاهیرەوە تەحەدای ڕژێمی کرد وبڕیاری بەژداریکردنی کرد لە کاتێکدا ڕژێم وەك سەگی هار وزامداری لێهاتبوو.
لەگەڵ هەموو ئەوانەشدا مادام خەڵك دەنگیان بە ئیخوان و سەلەفیەکان دا پێویستە هەموومان ڕیز لەو هەڵبژاردنە بگرین چونکە خەڵك وجەماوەر سەلماندیان کە ساویلکە وسادە نین بەڵکو لە زۆربەی کار ودەستپێشخەریەکانیان دەیسەلمێنن کە لە سیاسەتمەدارە موحتەریفەکانیش موحتەریفترن، ئیتر سەردەمی هێزی دەرەکی نەما ببێتە وەسی بەسەر خەڵك ئەوەی خزمەتی خەڵك نەکات وشارستیانیانە هەڵسوکەوت نەکات ئەوە گۆڕەپانەکانیان لێدەگرن... من زۆرم پێخۆشە ئیخوان وسەلەفیەکان حکومەتی داهاتووی میسر پێک بێنن نەک لەبەر ئەوەی ئاواتەخوازی نوشست هێنانیان دەکەم خوانەخواستە، بەڵکو هیوادارم بیسەلمێنن کە ئەوان خزمەتکاری گەلەکەیانن لە هەموو ئەوانەی پێشوو چاکترن، هیوادارم سەلەفیەکان کەمێک بێنە سەر ئەرزی واقیعەوە وئەو وێنە دزێوەی کە لە کەڵکەڵەی خەڵکدا لەسەر خۆیان دروستیان کردوە زوو بە زوو بە کاری چاک بیڕەوێننەوە ، لێدوانەکانی سەرۆکی حزبی نور عماد عبد الغفور هیوایەکمان پێدەدات کە لەوانەیە سەلەفیەکان لە قۆناغی تیۆریەوە دەردەچن بەرەو قۆناغی گونجاندنی سلوکیان لەگەڵ واقیعدا، سەرۆکی نور ڕەتی دەکاتەوە کە ئازادییە گشتیەکان وەک ئازادی دەربڕین وجل پۆشین بخرێتە ژێر حوکمی بنەماکانی شەریعەت دەڵێت:" ئەو شتانە بە زۆرەملێ نین" هەروەها دژایەتی خۆی نیشاندا لە دژی لێدوانەکانی یەکێک لە سەرانی دەعوەی سەلەفی کە وتبووی نابێت نا موسڵمان ببێتە وەزیر وئەندامی پەرلەمان وچوونی ئافرەت بۆ ناو پەرلەمان مەفسەدەیە..هتد.
ئەوە گۆڕانێکی واقیعی چاکە ئەگەر تا ئێستا تەکفیر نەکرا بێت لەلایەن هاوەڵە سەلەفیەکانی...
ئەو ڕۆحە شۆڕشگێرییەی ئەو شۆڕشانە بەرپایان کردوە ودەرچوونی ڕۆژئاوا لە هاوکێشەی پاراستنی ڕژێمە دیکتاتۆریەکان هەمووی زەمانەتن بۆ گەلان کە کەسی تر نەتوانێت وەک ڕژێمی ئێران بێتو بەناوی دین لەسەر سنگی خەڵک بەدترین حوکم پیادە بکات یان وەک دیکتاتۆرە چل وپەنجا ساڵییەکان حوکم بکەن...
کەوابوو بردنەوە لەو هەڵبژاردنانە بەهار نییە، هێندەی سەرکەوتن لە پاراستنی متمانەی خەڵک وسەرکەوتن لەو ئەزموونە بەهاری هەقیقییە، بەهاری هەقیقی تەنها لە دەستەبەر کردنی ئازادییەکان وعەدالەتی کۆمەڵایەتی ویەکسانی مرۆڤەکان بە هەردوو ڕەگەزەوە وپاراستنی مولک وسامانی خەڵک ودابەشکردنی بە یەکسانی دێتە کایەوە، نەک بەکاری منداڵانە وڕوالەتیانە وخەڵک خەریك کردن بە شەڕی عەقائیدی وموژدە لێدان بە هاتنی شەڕی بونەوەری هێرماجیدۆن.


شێخە ستایشکەرەکەی صدام: عائض القرني کتێب دزیش دەرچوو!!!

محەمەد هەریری
hariri66@yahoo.com





دەڵێن شاعیری گەورە فورەزدەق دەڵێت: "چاکترین دزی ئەوەیە کە دەستی تێدا نابڕێت" کە مەبەستی لە دزینی شیعر و وێنەی شیعری وئەندێشەی کەسانی تر بوە. بەڵام ئەگەر یەکێک بیرۆکەی شیعرێکیش بدزێت لە پاڵ دەیەها شیعری خۆی لەوانەیە خۆ ڕزگار کردن زەحمەت بێت، بە بیانووی لێکچوونی ئەندێشەیی یان ئەوەی عەرەب پێی دەڵێت [ توارد الخواطر] بەڵام بێیتو کتێبی خەڵک سەرتاسەر بدزێت وتەنها جەند دیکۆرێکی بۆ زیاد کەیت وەک گۆڕینی ناونیشانەکانی یان پاش وپێشخستنی بابەتەکانی یان زیاد کردنی چەند بابەتێکی لاوەکی کە هیچ شتێک نەخاتە سەر ناوەرۆکی دزراوی کتێبەکە، ئەوەیان دزییە بە رۆژی ڕوناک. بێگومان ئەو جۆرە دزیانە زۆر دەکرێت بەڵام لەبەر نەبوونی چاودێری وڕەخنەگرانی چالاک زۆربەی ئەو دزیانە پەردەپۆش دەکرێت وبەسەر خەڵک تێدەپەڕێت. ئینجا ئەو دزیانە کەسانێک دەیکەن کە لەڕووی ڕەوشتیەوە زۆر پەڕپوت بن وبیانەوێت بەسەر شانی خەڵک سەرکەون یان حەزیان لە زیادکردنی بەرهەمی جاپکراویان بێت بە خێرا تا لەناو مەجلیسدا بڵێن"من ئەوەندە کتێبی چاپکراوم هەیە!!!" من خۆم حالەتێکی وام دۆزیەوە بەڵام لەبەر چەند ئیعتبارێک بێدەنگیم لێکرد، ئەوەی سەیرە لەو حالەتەدا ئەوەیە کە ئەو کەسەی دزیە ئەدەبیەکەی کردوە لە هیچی کەم نییە لە شوهرەت وناوبانگی و ئەستێرەی کەناڵە ئاسمانییە خەلیجیەکانە ولە ڕووی مادیشەوە تەبلێی دەولەمەندە، کەوابوو بۆ دەبێت ئەو پیاوە لەو ئاستەوە ئەو کارە سوکە بکات وهەوڵ کۆشسی ئافرەتێک بدزێت کە مامۆستای سەرەتایی و دایکی مناڵێکی نەخۆشە بە نەخۆشی ئوتیزم [مەنگۆلی] ە؟؟!! بەڕاستی لە هەندێک حاڵەتە دزیەکانی بەناوبانگان بۆم دەردەکەوێت کە دزی کردن جاروبار وەک نەخۆشییە دەنا بۆ دەبێت کەسێکی میدیایی بەناوبانگی وەک [ئەلان شوگەر] خۆی ئیحراج کات ولە سوپەر مارکیتێک چەند میوە و سەوزەیەک بدزێت کە هەموویان نرخی ١٠ دەقیقەی کاری ئەوی نەدەکرد؟!
سلوی العضیدان خاوەنی کتێبی [هکذا هزموا الیأس] بەر لە دادگایی کردن دەڵێت کاتی خۆی کە ئەو کتێبەم نووسی بە هەزار دەردەسەری وبێ کاتی کە مناڵە نەخۆشەکەم زۆربەی کاتی داگیرکردووم، یەکەم دانەم بە دیاری نارد بۆ شێخ عائز قەرنی وکە ئەویش سوپاسنامەیەکی بۆ ناردم، لە دواییدا بۆم دەرکەوت کە ئەو کتێبەی منی کۆپی پەیس کردوە وناوی خۆی خستۆتە سەر لەگەڵ گۆڕینی چەند دیکۆرێکی لەفزی، ئەوە گەورەترین خەنجەر بوو کە پێم کەوتبێت لە ژیاندا، من تاوانباری شێخ عائز قەرنی ناکەم چونکە تاوانبار کردن بوارێکی تێدایە بۆ گومان وبەرگری لە خۆکردن، بەڵکو باسی هەقیقەتێکی ئاشکرا دەکەم وەک خۆر لە سەعات چواری ڕۆژدا، کتێبی [لا تیأس] ی شێخ عائز قەرنی  ٩٠% لە کتێبی مندا دزراوە بە هەمان داڕشتنی من بۆ بابەتەکان وبەهەمان کۆمێنتەکانی من وبە هەمان هەڵەی چاپکردن، ئەوەی مایەی پێکەنینی گریانهێنەرە ئەوەیە هەتا سەرەتاییەکەی کتێبەکەم کە بەخۆم نوسیبوم بیرۆکەی خودی خۆم بوو، کرابوە بابەتێك وخزاندراوەتە ناو بابەتەکان!! چۆن نەڵێم گەورەترین تانەم لێدراوە لە ژیانم، شێخ عائز قەرنی وەک نمونە وقدوەیەک بوو بۆ من لە هەوڵ وکۆشش وپشت بەخۆبەستندا کەچی دێت وئەو کۆششەی من لە ماوەی چوار ساڵدا بۆ نوسین وکۆکردنەوەی بابەتی کتێبەکەم [هکذا هزموا الیأس]  لە نێوان شەو وڕۆژێکدا دەدزێت!!
ئینجا لەو چاوپێکەوتنە دەڵێت کەوا خۆیی و مێردەکەی قسەیان کردوە لەگەڵ شێخ عائز کە تێیدا بە ئاشکرا دانی بەو دزییە ئەدەبییە ناوە کە بە قەولی الفرزدق [دەستی لەسەر نابڕێت] وداوای لێبوردنی کردوە بەڵام ئەو شێرە ژنە نەکەوتۆتە ژێر کاریگەری شەرم و عفا الله عما سلف، بەڵکو سێ مەرجی بۆ شێخ داناوە کە:
١- داوای لێبوردنێکی بە نوسین دەست.
٢- پەیمان دان بە بڵاونەکردنەوەی کتێبەکە
٣- کێشانەوەی لە بازاڕەکاندا.
بەڵام شێخ ڕازی نەبوە، بۆیە ئەویش مەسەلەکەی هەموو داوەتە دادگایەکی تایبەت بە وەزارەتی ڕاگەیاندن، لیژنەی مافی دانەر لەو وەزارەتە لە پاش خوێندنەوە و بەراوردکردنی دوو کتێبەکە بڕیاری سزادانی شێخ عائز قەرنی دا بە بڕی ٣٣٠،٠٠٠ هەزار ریاڵی سعودی، کە ٣٠٠،٠٠٠ درایە سلوی العضیدان وەک قەرە بوو، هەروەها بڕیاری کێشانەوەی کتێبە دزراوەکەی شێخ عائز قەرنی درا لە بازاڕەکاندا وخرایە سەر لیستی قەدەغەکردنی هێنانی لەدەرەوەش!
ئینجا لەپاش ئەوەی بڕیاری دادگاش دەرچوو بەکاوەخۆ شێخ عائز قەرنی هاتە سەرخەت ونەسەری کتێبەکە دەلاوێنێتەوە بەقسەی شیرین وکچی شیرینم وبەڵام هێشتا بە ڕاشکاوی دانی پیا نانێت و دەڵێت وەرە ئەوە لەو ٩٠ کتێبەی من چاپم کردوە هەرچیەکەت بە دڵە بیبە!! بەڵام لە تەعویزی چیدا؟! دەبێ ئەو ٩٠ کتێبە چۆن تەئلیف کرابێت؟؟ اللە اعلم. بۆ زانیاری زیاتر بڕوانە ئەو لینکانە:


کتێبێکی تریش
هێشتا لەو کێشەیە دەربازی نەبوە شێخە ستایشکەرەکەی صدام لە لایەن شاعیرێکی میسری بە ناوی سمیر فراج تۆمەت بار کرا بە دزینی کتێبێکی بە ناونیشانی: " شعراء قتلهم شعرهم" کە لە چاپی  مكتبة مدبولي قاهیرة یە لە ساڵی 1997 ، کتێبە دزیاریەکەی شێخ بە ناونیشانێکی نزیك لەوە بڵاوکرایەوە بەناوی: "قصائد قتلت أصحابها"، کە لەدوای شەش ساڵ لە چاپکردنی یەکەم کتێبدا چاپکراوە. من لەوە زیاتر ناتوانم قسە لەسەر کتێبی دوەم بکەم چونکە کێشەکە هێشتا لە سەرەتایە.
دەتوانیت بۆ زانیاری زیاتر ئەو لینکە بخوێنیتەوە:
لە ٢٨/١٢/٢٠١١ بەبەتێکم بڵاوکردەوە بەناوی [شێخ عائز قەرنی و قەسیدەکەی سەدام : بەدرۆخستنەوەیەکی درەنگ] تێیدا گومانم خستبوە سەر عەو بە درۆخستنەوە درەنگەی شێخ عائز قەرنی بۆ قەسیدەکەی سەدام وەک لەو نوسینە هاتبوو: " لە پاش لە سێدارەدانی سەدام وئەو هەرایەی نایەوە گوایە لە رۆژی جەژن ورۆژێکی پیرۆز لە سێدارە دراوە، هەر لەو کاتانەدا کە عەرەب کێرڤی عەرەبچیەتی وسونەچێتیان زۆر بەرز ببوەوە، هەر لەو ساتانەدا قەسیدەیەک بەناوی شێخێکی داعیەی بەناوبانگ شێخ عائز قەرەنی بڵاوبوەوە لەسەر سەدام کە سەرتاسەری ستایشی سەدامی [شەهیدی عروبە وئیسلام بوو] ڕاستییەکەی لەبەر هەلوێستی عەرەب بە گشتی وسعودیەکان بە تایبەتی ئەو قەسیدەیە زۆر لەگەڵ کەشی گشتی روداوەکە دەگونجا وکەس گومانی لە ڕاستی قەسیدەکە نەبوو" من گەیشتبومە ئەو باوەڕەی کە ئەو قەسیدەیە ئەگەر هی شێخ عائز قەرنی یش نەبێت بەڵام لەبەر حەزی شوهرەت کە شێخ ئامادەیە دزی بۆ بکات خۆی لێ گێل کردوە تازە لەبەردەم چەند کوردێکی سادە وبێ ئاگا قەسیدەکە بە درۆ دەخاتەوە : " وابزانم شێخ عائز قەرنی لەگەڵ ئەجوائەکە ئاوێتە ببوو لای خراپ نەبوو لە ڕێی ئەو قەسیدەیە ئەگەر هی ئەویش نەبوبێت کەمێک سەرسامی وحەزی شوهرەتی زیاتر بخاتە سەر ئەوەی هەیەتی!! بەتایبەتی خۆشەویستی سەدام لەو رۆژگارە وتا ئەمڕۆش لای زۆر لە عەرەب جێگای شانازی کردنە نەک شەرمەزاری، ئەگەر ئەو قەسیدەیە لە ستایشکردنی سولحی نێوان عەرەب وئیسرائیل یان لە ستایشی خومەینی با بۆ نموونە ئەو هەموو ساڵەی دەویست شێخ عائز قەرنی بێدەنگ بێت ولە موناسەبەیەکی بچوکی کوردان لەبەر دڵی ئەوان تازە ئەو قەسیدەیە بەدرۆ بخاتەوە؟؟"
پاش ئەو دزینە ئەدەبیە من یەك تۆزقاڵ گومانم نەماوە کە قەسیدەکەی سەدامیش هەر هی خۆیەتی، چونکە ئەوەی دزی ئەدەبی بکات لە پێناو شوهرەتدا کە خەریکە دەتەقێتەوە لەبەر پڕی شوهرەت زۆر ئاسانە درۆش بکات لەبەر ئیحراج بوونی بەردەم چەند گەنجێکی کورد بڵێت من شێخە ستایشکەرەکەی صدام نیم.
لەندەن
٢٤/١/٢٠١٢